StealJobs:中環人收入的高山低谷

 StealJobs:中環人收入的高山低谷

假如香港人的工作以地域來劃分,最多人返工以及最有象徵性的地點,莫過於中環。

傳統意義的中環,以皇后大道中的緯度來作分界,東至長江中心,西至中環中心,恰巧都係誠哥的地標巨廈。 對於中環這個國際都會中心所發生的一切,社會上有唔少Fantasy,其中一個就係中環人個個都係高收入人士,而且身光頸靚。

可是,只有真正在裡面工作同生活過的人,才會體驗到中環人收入與生活,其實有著自己的「高山低谷」:在每個高收入中環人的背後,難免有幾十個普通甚至低收入的中環打工仔。


「高山」

先講講中環裡面的「高山」高收入人士。眾所周知,中環有唔少跨國企業同投資銀行進駐,作為地區甚至集團的總部,同埋有各行各業的專業人士選擇作為辦公地點。除此以外,仲有好多富三代甚至四代的「Family Office」同埋獨立做Deal的顧問。以呢一個階層來睇,擔當公司中上管理層角色的人士,確實唔少係月入幾十萬甚至係月入過百萬的「月球人」高收入人士。

SJ曾經見過一些極端例子,例如專科的外科名醫,自己在中環開設診所,一星期一半時間在診所應診,診所病人一個接一個接應不暇,每次診金一千到兩三千不等;另外一半時間在「掛單」的私家醫院做手術,每次手術基本上以十萬起跳,一日亦唔止做一個手術。有數得計,做得中環名醫,月入一百萬不是夢。

另外也有三十出頭的保險經紀,平時在中環寫字樓落腳,受惠於大陸客戶湧進香港狂買保險與理財產品,過去一兩年已經平均月入超過二十萬。還有老牌家族的Family Office後人,家族有幾座中上環的小型寫字樓收租,自己預留一層作辦公室,收入係以千萬元為單位計算。

以頂尖公司同行業而言,即使係入門級,大學畢業生入職立即月入4-5萬亦係比比皆是,還有很多如上述的行業頂尖翹楚及名門望族後人。此可謂中環人收入的高山。

StealJobs:中環人收入的高山低谷

(image via Lookbook)


「低谷」

另一邊廂,雖然大家都在中環,其實亦有大量負責處理文書的文員或後勤角色,主要責任則是協助及支援中環前者的「高山」。他們月入大多不過一萬幾千,即使多年工作人工亦頂多升到兩萬幾,而且晉升前景欠奉。當然,文員及後勤員工的功勞其實功不可沒,也往往被社會低估。可幸的是,即使是普通文員,其實一樣有機會逐步透過工作表現同進修而升職,甚至轉行到更有前景的行業。

StealJobs:中環人收入的高山低谷

(image by Jeremy via flickr)


正如收入的「高山低谷」,其實雖然大家都在中環工作,大家的生活習慣亦有著本質上的大不同。與普通打工仔非常不同的,就係上述的中環高收入人士傾向過曾俊華口中的「中產生活」,對品味有一定程度的追求。當然,大部份時候,所謂品味難免都要用一點點物質來支撐,但本質上又同土豪式的物質好唔同,唔容易掌握。例如,走在Landmark,見到一個在樓上跨進律師樓工作的女律師,手握一個Chanel手袋,身穿Max Mara連身裙,星期五Happy Friday的中午與幾個女友人,在蘇豪區的地中海餐廳食個人頭三百幾的午餐,再開支千幾蚊的葡萄酒,閒談工作日常以及聖誕假前返大學時期讀書的倫敦,參加鬼妹同學的婚禮。呢種可謂最Typical的中環式中產生活,再加上獨居的堅尼地城或灣仔的幾百呎單位,雖然稱不上土豪生活,但亦需要月入8-9萬其中的一半左右來維持,所以即使高收入,唔少人積蓄唔多,部分人更落得每個月的收入餐餐清的境況,其實頗為不智。

StealJobs:中環人收入的高山低谷

(image by hans peter meyer via flickr)

相比中環高收入人士出入宴會場所與高級餐廳的典型中產生活,中環的普通打工仔,大多與別區的普通打工仔無異。普通文員雖然出入甲級商廈,即使在33度的盛夏都身穿西裝,但其實都難免成為平價茶餐廳與快餐常客,放工則乖乖坐巴士地鐵返回那遙遠的家(唔少住在偏遠地區),或偶然同朋友食一次每人百零二百蚊嘅聚餐。

講到偏遠地區,相比起其他商業區如鰂魚涌、旺角以至觀塘等,中環擁有重大交通優勢,基本上1個小時左右,就可以去到全香港任何主要住宅區,包括新界東西甚至離島,維持著便利的一小時生活圈。早前就有段廣泛流傳的短片,講新界西居民到將軍澳返工,每日要花成差唔多4個鐘在交通工具上,可謂舟車勞頓。起碼,中環的普通打工仔,多得中環交通發達,基本上都在可容忍的車程內。

由此可見,雖然大家都係所謂「中環人」,但對於唔少同樣在中環返工、每月收入不過係香港入息中位數的文員或後勤人士而言(即大概一萬五千),其實與上述的高收入人士相比,已經係不能想像的兩個世界。


SJ結語

其實,人比人,比死人。要知道各行各業的人工待遇,重點並非係用來攀比或者睇唔起人,更重要係有一個時刻「知己知彼」的腦,以及力爭上游的心,努力找一份適合自己的工作,以及為長遠事業選擇航道,呢個遠比羨慕或比較來得更為重要。2017年差不多又過去,希望大家來年一起努力,成為更好的自己吧!

StealJobs:中環人收入的高山低谷

(image by superherb via flickr)

 

StealJobs.com主編──SJ

 

全面透露各行各業入行攻略,上位貼士,以及行業秘聞。

 

檢視此作者的所有文章

 

延讀閱讀:

StealJobs:其實 識做Sales先係王道

StealJobs:如何在求職面試突圍而出?

一個三十幾歲男人創業失敗的故事

 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案