Sunday抗返工抑鬱大法

抑鬱

原本美好的星期日,卻充塞著返工恐懼,黃昏後恐懼指數飆升,心情跌落谷底,冇晒mood,可能係你同我嘅寫照。星期日唔想咁頹,可以點?睇睇以下六個小貼士,或會讓你輕鬆擺脫星期一返工恐懼症。

1. 星期五放工前唔該做晒佢

有不少人習慣星期五放工前將未完成的工作帶到家中﹝帶住手提電腦回家確係feel good﹞,可是周末總是吃喝玩樂,到星期日晚驚覺工作根本未掂過,憂慮和驚嚇指數自然十倍飆升﹗請嘗試星期五放工前盡量完成手上工作,或為未完成的工作做一個完整規劃,讓星期一可按步就班達成目標,星期日心情自能安定下來。

2. 不去想可憎的人和事

其實令你最抑鬱嘅往往都係你老細同埋一班乞人憎嘅同事﹝如果你同人唔夾嘅話﹞,請閣下不要自找煩惱,千祈千祈不要不要於星期日這個美好兼難能可貴嘅假日諗呢啲討厭嘅人和事,星期一先去面對吧。

3. 星期一上午開會?No!

如可調配自己的工作,盡量將較簡單輕鬆的任務安排在星期一完成,會議亦盡量不要安排在星期一上午進行。每逢周日,只要一想到第二日不須要處理太繁瑣的事項,又唔駛即刻開會,同事開心,你又開心。不過講就簡單,如果閣下冇say,就要努力上位做話事人喇。

4. 讀一本你喜愛的讀物或電影

朋友個個都family day唔睬你?冇問題,找書或電影陪自己﹗唔係要你升呢做「文青」,閱讀文學巨著或睇藝術電影,只要是你想讀想看的,不論是漫畫、愛情小品、娛樂八掛、時裝扮靚、星座占卜塔羅……總之找一些令你開心的題材,返工前一日Time out一下,投入另一個世界﹗

5. 做一件令別人開心的事

可能你會想:自己心情已經喺谷底,何來逗人開心?其實幫人反而會令心情變得輕鬆愉快。揀一件輕鬆事情,大小不拘、形式不拘。可以是主動逗家人或男女朋友開心,或者陪伴父母仔女閒談一小時,一些微不足道的小事,絕對可以令人令自己發出會心微笑。

6. 完成一項小創作

即使你自問不是有創意的人,也可嘗試安排於星期日創作一些有趣的東西,例如烘焙甜品糕點、整頓家居擺設。當你做出這些小創作時,或多或少都可獲得一些﹝不對外公開的﹞自我膨脹感,又可以讓心情好一點了。