[生財有道]Top 5公司逗利是惡劣行徑

Top 5公司逗利是惡劣行徑

新年快樂!又到咗每年一度已婚打工仔放血嘅日子,新正頭一開工,成隊外貌年輕有為嘅大好青年就會好似龍捲風咁兜埋嚟,捲走哂啲血汗錢。雖則話出得嚟行,預咗要還,但年輕員工應明白,派利是係為咗攞個意頭,第時大家合作都開心啲,唔想逗利是逗到犯眾憎,應避免以下行徑:


第一位:平時黑口黑面,新年過嚟搲利是

好多已婚打工仔都認為,不少80後、90後平時目中無人,pantry撞到招呼都唔打聲,但到新年又走嚟搲利是,絕對係最討厭嘅一群!你唔尊重我,點解要俾錢你洗?十蚊都嫌俾多!

宜:其實唔只新年,同事間平時都應該互相尊重,你對我好時我對你好。


第二位:全公司成千人同事,唔派哂就喺度唱人

如果公司只有幾十人,要派哂俾所有未婚同事都唔算好大負擔。但如果係千人公司,除咗老闆要每人一封開工利是,要一個中層manager派哂俾所有人,同攞人哋條命冇分別。喺背後唱嘅人,就更加唔要得!

宜:注意如果公司多人,一般只會派返自己team同平時有溝通嘅同事。


第三位:年紀大、職位高走去逗利是

如果你一個月搵五皮,走去同個搵皮幾、養緊兩個仔女嘅媽媽逗利是,就唔好怪人背後鬧返你嫁唔出、唔知醜囉。

宜:小編以前有個未婚高層同事,每年開工都晏晝先返,費事尷尬添。


第四位:話人派單封係離婚、喪偶

其實派單封定雙封係睇公司文化(雙封都可能係兩封十蚊),如果唔識對方配偶,其實派單封都好正常。就算對方係俾單封,如果收完人仲要講埋啲咁唔吉利嘅說話,真係好缺德。

宜:其實利是係開心錢,無論收幾多都應該心存感激,因為本身係冇㗎嘛。


第五位:同茶水姐姐逗利是(除非好熟)

茶水姐姐(甚至part-time)人工可能只有幾千,仲要日日做得咁辛苦,仲問佢攞錢太肉酸啦!

宜:除非你真係同佢好熟,又知佢樂意派俾你。

 

延伸閱讀:

辦公室逗利是攻略

辦公室逃避派利是攻略

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案