「你OT代表工作效率低﹗」涼薄說話失人心 上司應用這5句征服下屬

自古以嚟，「打工仔」同「老細」都係處於對立嘅位置。有啲無良老細本住「我係老細，所以我大晒」嘅心態，用難聽、侮辱性甚至問候式嘅說話，暗示或明示打工仔嘅地位比佢低，做嘢能力比佢差，從而打擊對方嘅自信，要對方100%服從。打工仔心諗：「其實大家都有阿爸阿媽生，可唔可以當返我係一個人，而唔係你嘅出氣袋？」

所以好多時，打工仔如果有幸喺一間尊重自己嘅公司度做，真係會肯心甘命抵咁同你OT，甚至喺有困難嘅時候同公司共度時艱。有啲說話，打工仔真係好想從老細口中聽到！

1. 「我錯了」

聖人都有錯，有時老細畀錯指示，或者作咗個錯嘅決定，真係一啲都唔出奇，而作為下屬幫老細善後亦係份內事；不過可以簡單講返句「唔好意思，搞錯咗」，顯示返應有嘅氣度同埋責任感，而唔係死兜爛兜扮冇事發生，或者篤條「o靚」出嚟做箭靶。

2. 「辛苦晒」

其實打工仔OT，唔係因為OT好開心，而係佢哋想盡好自己嘅責任，知道件project交到落自己手上就要做好佢，而非搭正六點就一走了之。不過總有啲老細唔識趣，講埋啲風涼說話好似：「Work smart, not hard」、「你OT代表你工作效率低」、「你咁勤力真係抵請，呵呵呵」，完全唔體恤下屬嘅辛苦同付出。

3. 「你點睇」

Micromanaging（微管理）係現代職場嘅大忌，作為一個接受過教育、有返咁上下社會經驗嘅成年人，點會鍾意做每一件事都俾人管住同挑剔。相反，老細放手畀下屬去提出意見、作決定，係可以令打工仔對工作更有士氣同投入感，激發佢哋嘅潛能。（不過，有啲老細假民主，聽完意見後態度照舊，甚至棒打出頭鳥，又係另一個問題）

4. 「你A、B、C做得唔錯，而D、E、F可以再做好啲」

打工仔畀心機做完一份project之後，當然希望老細會賞識自己做得好嘅地方；同時，其實打工仔都好希望老細見到自己有咩不足之處，可以指出同埋教導點樣做好啲，等自己有所得著同進步。至於好似「乜你做啲嘢咁垃圾」、「搵個識呼吸嘅人都可以取代你」、「周街都係人點解你開唔到單」呢啲無腦嘅發洩說話，多講無益啦。

5. 「我決定升你」

其實畢業後選擇做寫字樓工，原因不外乎係希望份工有「成長」──即係可以累積經驗，職位同人工都可以隨住年日拾級而上；所以為公司仆心仆命咗咁耐，老細一句「冇得升」簡直比話你廢更難聽。如果唔介意升唔升職，我點解唔走去做12碼保安，返工時間可以睇書、玩電話，拉閘就可以收工，月入仲可以15k？做乜仲要喺office搵11k仲要晚晚免費無限OT？

其實遇上一個好老細真係好難得，唔怪得好多人會覺得公司文化仲緊要過人工高啦！

（圖片來源：WhatsCap）

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。