地盤佬日誌—停工
對地盤嚟講，停工係全個地盤所有人，上至管理人員，下至師傅們，都最唔想見到嘅情況。因為停工只會令工期愈停愈趕，仲有好多附加文件要處理，而日薪師傅亦都會手停口停。今日就講吓有咩常見嘅停工原因。
天氣原因停工
最多機會出現停工的理由就係天氣，由暴雨到颱風都有機會局部或全面停工，直到天氣好轉。傳統行規，如果師傅返到地盤先叫佢返屋企就要俾半工（半日人工）。不過近年好多判頭都係比一兩百車錢，有啲直頭咩都唔比。颱風就大家一齊停，不過安全佬、雜工雜項佬、棚佬打風前後都會好多嘢做。
我自己印象最深刻嘅就係澳門天鴿個一次颱風，幾層地牢全部浸晒水浸到上地面。我粗略計過最小有八萬立方米水，淨係抽水都抽一個星期，之後完全復工差唔多成個月之後，諗返都覺得好震撼！
安全原因停工
另一個大家都好唔想見到嘅停工理由，就係因為工業意外要停工。通常有咩工業意外死人冧樓，政府人員嚟到第一件事就係停工，之後啲PM同埋安全我（工程師）就會夾份諗點樣去寫返個改善方法。內容好多時都係紙上談兵，現場多數係做唔到，交份改善方案俾政府去游說俾地盤復工，多數都係一兩個星期可以復工。不過之前傳說有啲極端例子，係政府入到地盤發現地盤好多地方無跟批則做，之後政府要佢重新入則，再批則之後先可以復工，停咗幾個之後先可以復工，損失慘重。
大業主原因停工
大業主停工又有分主動同被動，業主主動要求停工多數係因為改圖則，有時係業主想改用途，例如原本做酒店但係突然想改做服務式住宅、原本層樓多四房單位，但係買樓部話開放式好賣啲就改鬼晒佢。
另一個大家最唔想見到嘅情況就係業主被動停工，例如近年內地講嘅資金鏈斷裂，最簡單嘅講法就係業主冇錢找數。要去到停工，多數業主最少無找幾個月數，有時甚至係年幾兩年無找數。呢個時候大判同判頭多數都頂數頂都冇晒錢，之後全個地盤嘅多數工人都冇糧出，基本上成個地盤所有人全部都係輸家。希望大家都冇遇到呢啲情況。
最後祝大家工接工，永遠冇人拖你糧。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
