正常一個人喺20歲之前,體力同埋智力都會不停上升。相反,多數人喺20歲之後,智力都係維持不變。但係,點解你會覺得有人愈嚟愈叻,係因為佢哋嘅學識同埋經驗有所累積,慢慢地大家有不可彌補嘅差距。
地盤從來都係三山五岳咩人都有,特別係吹水怪最多,點樣分辨就真係一樣好重要嘅技能啦。
試過有一次有個紮鐵判頭打理帶咗幾個新嘅師傅嚟話:「佢哋好做得野嘅!」,我一睇就心知:「瀨嘢啦,雖然個樣就大大隻隻咁但係皮膚白雪雪嘅,我真係未見過有紮鐵佬唔係黑到成條柴咁樣嘅。」,之後嗰日就已經有一兩個中暑,過多一個禮拜仲走剩一個。
又試過有一次,另外一個打理帶咗個師傅嚟,話又有經驗,又話各方面都好嘅。咁我同佢握手啦,一握手就知個打理一定係呃我嘅。因為個師傅隻手又柔軟又滑,咁樣樣一係就新仔,一係就企鵝(即係齋企喺度唔做嘢)。
另外一個好重要嘅睇人經驗,就係千祈唔好借錢俾賭仔。雖然賭仔有分兩種,一種係贏錢又冇心機做嘢,輸錢又冇心機做嘢。另外一種係,賭輸錢就會好勤力做嘢。不過無論係邊種,又就算幾好兄弟都好,佢哋都係會一鑊翹起你。
喺地盤裏面有兩種管理層,一種係牛奶仔(高學歷但係現場經驗通常唔足夠),另一種係紅褲子出生(喺現場由低做起經驗好足夠嘅)。通常地盤有好多工序都要首先搞好施工方案,之後再審批,最後再喺現場實行。但好多時施工方案都係由啲工程師仔去寫,但係去到現場就會發覺:「呢樣又唔得,嗰樣又唔得冇考慮到好多實際情況」,於是就會比啲管工老總話跟唔到。但係,你叫啲管工去寫呢,佢哋又寫唔出。所以,最好嘅解決方法通常都係,寫方案時唔好閉門造車,大家傾好先去寫。同埋,喺現場做到相同效果嘅情況下,再俾啲判頭作出微調,先係最好嘅選擇。
喺我哋呢行裏面,差唔多每一個做得來的人都瀨過好多嘢,尤其是通常係入行頭嗰幾年,多數都會爆鑊到要搵大佬幫手先拆得掂。但係,比個新仔喺多年後再遇見當年嗰啲情況嘅話,到時之前個新仔就會變咗做大佬,去幫返其他新仔抹屁股啦!
港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。