識人好過識字？想做平面／廣告設計師，2個方法冇人脈也可入行！
有網民在論壇開post問：「到底平面或廣告設計師點搵工？」接著，他連珠炮發問：「作品集要幾pro先搵你面試？有片嘅點畀面試官睇？商業設計有咩標準去揀人？最後一問，份工點睇？」
眾網友分享經驗之談：
「真心難搵，就算有得比你in hr都會話你太green、太新、無經驗。」
「然後佢地in有經驗既又會話你太貴太老掂唔掂。」
「識人好過識字。」
「啱 grad個陣真係好靠啲老師幫手介紹工。不過前提都要係你in得好，能力有咁上下。」
「如果portfo得平面嘢就輸一半先啦，你話10年前仲話得，家陣咁多嘢可以上網學到，隨隨便便都整返d動態嘢3d圖落去好似motion graphic依d先有睇頭。btw細公司既通常都係睇心情多過portfo，除非睇落真係好撚專業。」
有興趣的讀者可睇番原文
▪ UI/UX設計師吃香－翻譯系畢業生唔做marketing 自學成功轉型做埋老闆
其實要搵平面或廣告設計師，或者其他創作類工種如撰稿員、攝影師等職位，正如其中一位網友留言：「識人好過識字」，但唔識人的有志者，也不是沒有入行機會。如果求職者係：
✓ 識人，請注意以下第1點
✓ 識字，希望以下第2點和第3點對你搵工有所幫助
1. 識啱人
相信大家都知在商業社會裏，打通人脈的重要性，對搵工來說，更是如此。除了上求職網站，「阿蟲介紹我嚟嘅」是入職創作類工作捷徑。這些「阿蟲」，可以是求職者早已入行的親朋戚友、學校前後輩、舊同事等。一旦他們任職的公司有空缺，兼覺得相識的某君條件切合，便會穿針引線，推介予上頭，若對方信任其眼光，面試後又合眼緣，職位手到拿來，免卻寫應徵信步驟。有時，做阿head者更不避嫌引薦人選㖭，所謂「藤掕瓜瓜掕藤」，屬職場司空見慣的事。初出茅廬的新鮮人，未及在業界建立廣泛人際網絡，若是修讀設計專科，或有院校老師善用人脈，樂意介紹得意門生入行。此外，讀書時爭取在相關行業實習，盡早識人，提升畢業後入職機會。
2. 做好個人作品集
唔識人，冇相干，識字可補救。識得舞文弄墨，揸機影相，將自己的心血結晶結集為portfolio個人作品集，成為開啟創作系工作之門的鎖鑰。此等行業職缺並非純由熟人介紹填補，也常常登招聘廣告，open for all，吸引有能者競逐，從而請到理想專才。假如像樓主般，識字多過識人的，就要憑與眾不同的創作來說服面試官，自己是the one。現在不乏網上平台如Wix、Medium、WordPress等，教求職人士製作portfo，易學易用，而且費用全免，輕輕鬆鬆將個人作品整靚啲、pro啲、有個人風格啲，面試時都有信心啲。當然，話明作品集，「餡」的水準先行，需要時間「儲」的。工作經驗未夠時，由學生時代的習作，到主動找尋創作機會如參加比賽投稿，便可漸漸令自家portfo的內涵豐富起來，見得吓人。
▪ 入行15年Graphic Designer勸誡：「入行前要諗清楚」
3. 自我推薦
若然真的很有興趣做平面或廣告設計師，尤其是想加入心儀agency，卻苦無高人指引，與其枯等該公司刊登職缺，不如主動出擊，send email自薦。講真，就算識人鋪橋搭路，順利圓夢，但沒有潛質唔打得，日久實力見底，亦不能立足，遲早被淘汰。創業行頭求才若渴，對有腦有技術的人才「門常開」。不過，要博得HR或主考官青睞，抄考的大路求職信一定行不通，須有創意，搶眼得來有point，花俏得來有焦點，再附上精心製作的個人作品集，令對方留下深刻印象，未來有空缺時也許會想起你，博得面試機會。
P.S. 看一些設計圈行家的網民留言，反映出做「嗰行呻嗰行」，此乃打工仔之常情。別人的經驗可作參考，但對自己感到興致勃勃的行頭，還是親身投入，嘗試箇中苦樂，才能決定是一生所愛，抑或只是踏腳石，要另尋職涯路向。Of course，一切得從成功入行說起。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
