酒店工作穩定性成疑？網民：「讀完旅遊但驚入行」興趣與人工要咁揀！
有網民在論壇開po問：「依個時勢入酒店做好冇？」
樓主跟住詳細解說：「本身返緊住宅會所，接待清潔維修巡查文書乜都要做，$12k，返五日，一日九個鐘，最早返7:00，最夜果更收23:30 。但最近見到病另一份工，係做酒店禮賓部，主要負責查詢接待服務，$17k，返五日，一日八個鐘，最早返7:00，最夜收22:00。
會所就穩定，一定唔會炒人，但人工勁低，並唔係我自己想做嘅工，係而家馬死落地行，做住先。因為我本身係讀旅遊科。酒店就係自己想做嘅工，人工高好多，仲要包食，但驚遲啲生意又唔好又炒人。雖然嗰間酒店係大型五星級，其他國家都多分店。 唔知博唔博得過好。」
網友意見似乎一面倒：
「返酒店，完！」
「睇未來發展都應該揀酒店。」
「邊度錢多做邊度。」
「做咩咁驚裁員 屋企等你開飯？
唔等開飯緊係酒店 等開飯更加要簡份人工高既！」
「緊係入啦 一年都多6萬啦！」
「可以做，但一定揀front desk/guest relation/ back office。」
有興趣的讀者，可睇返連登論壇的原po
▪ 6大疫境高危職業！航空、酒店、旅遊業員工最想轉行 時尚圈亦當災
根據Jobsdb《疫情下職場調查》，49%打工仔遇到的頭號擔憂是工作的穩定性。樓主的個案，正正反映到時下打工仔的典型疑慮，天不怕地不怕，最怕份工唔穩陣。
興趣與薪金兼得，Go Go Go！
工種穩定以外，再增添「興趣」這元素，睇法就大不同。一般而言，求職新世代予人的印象往往是以個人興趣行先，薪金屬其次。惟面對疫境，是否仍能如此「任性」？去年一群大專生組成的「菁研」工作小組，聯同突破機構，進行一項《「去興趣化」職展與工作前景研究》（「職展」意即職業發展），發現6成半受訪者認為自己無法將興趣轉為職業；而半數受訪者會為生活選擇主流職業，而放棄興趣。樓主讀旅遊科，向來想入酒店做，如果眼前有份酒店工，既切合個人興趣，又能學以致用，人工且比現職高，此時不博待何時，go ahead！即使在會所打工非第一志願，也是與款待業相關，樓主的「職展」毋須「去興趣化」，真係好幸福呀。難題只在於做會所穩定，心儀的酒店工卻不穩定，恐防做幾個月會慘遭裁員，又要再搵工。But，在全球都邁進新常態下，要搵份穩定又長遠的工都幾難⋯⋯
有永遠穩定的工作嗎？
沒有。以為會所工好穩陣，但有些會所也會炒人，有些也會執笠的。本港便曾有實力雄厚的豪華私人會所結業離場，遺散所有員工的個案。其實未有新冠肺炎這隻超級黑天鵝出現時，我們已有「變幻原是永恆」的金句，何況是連匯豐股價都屢創新低的今時今日，everything is possible。打工仔要適應職場話變就變，話重整架構就重整的「永恆」特質。個人亦要求變，更須坐言起行，不是得個講字。樓主回應網民時透露是fresh grad，兼職經驗好多，但全職經驗就得會所，驚入職酒店後被裁就好難搵工。這是過慮了，就算酒店工做得幾個月貨仔，都係經驗，因僱主生意欠佳而食無情雞屬非戰之罪，HR不會大扣分的。
酒店業會永陷危機嗎？
不會。無可否認，Covid-19無預警突襲下，旅遊款待業深受打擊，比起來，酒店界的境況未去到絕望地步。業界急轉彎，各出奇謀爭取本地客staycation、促銷長住或假期住宿優惠，以至推出防疫套餐等等。餐飲方面亦變陣出招，力sell高質外賣、自助餐改任點任食⋯⋯盡顯疫戰求存的打不死精神。且看港人「鄉下」日本，疫情稍緩，適逢9月下旬有個4連休假日，加上政府大推「Go To Travel」國內旅遊復興計劃，東洋各地著名景點重現人山人海，頗有「報復式」出遊之勢，其中五星級酒店大受旅客歡迎。當然，迫爆人潮會否導致疫情反彈，此是後話矣。當前是病毒雖然厲害，也壓不住世人蠢蠢欲動的「旅遊蟲」。寄望疫苗盡早研發成功，全球關口解禁，由旅遊氣泡開始，世人又可踏上征途，酒店業亦再見春天了。
▪ 失業搵唔到工點算好？10個低成本創業及搵錢Idea兼成功例子
話說回來，有網友正中紅心，問樓主：已有offer？Yes的話，恭喜恭喜；No的話，多想無益，見到啱心水的酒店工，何妨放手一搏！
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
