【搵工面試】見工要拍短片自我介紹？3大重點令你突圍而出
現時見工單憑一張韓式靚靚證件相還未夠，還要send條短片力證真身。這種多媒體式面試玩法，考起好多應徵人士。有網民在論壇開po問：「外國公司係咪特別鍾意叫你拍片取代第一輪面試？」事緣他申請一些非關創意媒體的工作，如internal sales、MT等職位，但有些公司要applicants拍片答情境題；有些要分享對該公司的認識；更有些須解釋獲聘理由，總之有片（比Video CV更進一步）方有下文。拍片燒腦又燒時間，令樓主搲晒頭。
網民試圖解答樓主疑惑：
「唔啱心水咪In過下份， 反正遲早多媒體技能都會好似識打字一樣咁基本。」
「因為可以隨時唔睇，但interview唔好意思in十秒就完。」
「睇下你會做一樣野做到幾盡。」
「其實香港都有，例如係機管局mt，報完send email話要拍片，我諗好多人唔想拍就可以篩咗好多。」
有興趣的讀者可睇番原po
▪ 2021年招聘新趨勢！態度、個性較First Hon畢業重要 求職面試如何加分？
▪ 3分鐘摸清招聘新玩法！除Video Interview，有咩最新面試改動？
記得曾有份號稱全球最理想的工作，徵召各地奇人異士競逐。而初步見工方式，就是先拍一段短片作自我介紹，讓有關部門評選，以進行下一輪比賽。數數手指，這份澳洲大堡礁保育員的筍工，早在12年前已是先知先覺的高人，當時或者已聞到「拍片式面試」的潮流一觸即發。十多年後的今天，很多機構，無論是外國的，還是香港的公司，第一輪面試求睇片，且要求的短片已非Video CV咁簡單，也是順理成章的事。由此引伸到，要應付這些面試玩法，必須逐步掌握3大技能。
Step 1：講好自己的故事
無論是一個國家想提升形象，一件產品想俘虜顧客，抑或個體戶想求職，務須具備「講故佬」技能，將自身故事講得動聽。這又不僅是指與他人溝通，或交代事務，或描述產品的敍事能力（storytelling），而是昇華版的「自我介紹」。出色的表達技巧固然可助攻，但講到天花龍鳯並非無往而不利，因為content is king，內容紥實最重要，由人生觀、個人興趣、專長、職涯目標⋯⋯投射出故事主人翁的底蘊，表達能力稍有不足，亦不礙大局。那麼，初出茅廬的新鮮人，人生經驗欠奉，豈不是蝕章？其實某些教育系統，注重培養學生的全人發展，踏出校門去見工，把自己的願景娓娓道來，輔以探索世界、解難的經歷，比起填鴨式調教出來、死記爛背面試題目之輩，自然令面試官較聽得入耳。識得講故事的Fresh Grad，不難求得一官半職。
Step 2：在鏡頭前講好故事
正所謂「Hate it or love it，有片有真相。」大家身處視覺至上的世界，加上新冠肺炎帶來video interview的新常態，大家除了磨練面對面講故事的技巧，還要快快打上醫治camera shy的特效疫苗，好讓自己能在鏡頭前揮灑自如地談天說地、回答問題、應付突發情況（有網民分享zoom見工時，突然間對方叫企身轉個圈，信不信由你！）。入職後，也避不了開視像會議。講多無謂，購置合用器材、研究最上鏡的妝化服⋯⋯我們提供了很多戰勝視像面試的竅門，有興趣的讀者可以Click入呢個「視像面試秘笈」網址。
▪ 【見工面試穿搭】見工考衣Q﹗憑工種決定Business formal或Smart casual 視像面試顧上不顧下有危機？
Step 3：用鏡頭好好講故事
比同鏡頭做朋友更高難度的，是透過鏡頭講故事。正如樓主呻，有些公司已從齋講的自戀式Video CV跨一大步，要求candidate拍創意短片，以影像回應HR千奇百怪的問題。無錯，應徵者須化身導演、創作總監，以至演員，這樣便帶來兩大難關。一是攝製技術，二是創意。器材易得，技術亦可上課進修，或網上自學，敢拍肯改自會日益精進。創意卻難得，而創意，絕對是任何年代求職不敗技能。該等機構如此出招考人，當然是想招攬有創意的奇才。不過反過來說，擅於用鏡頭講好故事的奇才，也不一定會上班，不如去影音平台拍出一片天。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
