乞客:臨別香港炒散界之瑪莉真情剖白
行業小薯「辛」訴:
關於我份工,我想你明嘅係……
臨別香港炒散界之瑪莉真情剖白
by 乞客 The Beggar in the Restaurant
臨別香港炒散界之瑪莉真情剖白
唔經唔覺做咗餐飲都有足足十年~因為鐘意設計同飲食兩面做吓,實際長工應該都無3年,其他時間都係做Part time兼職,而家應該就流行叫炒散。以前做Part time感覺同長工無乜分別,因為基本上一星期都要返足三、四日,仲要準時畀更。星期五、六、日就一定要返,如果唔係都唔洗旨意位經理再重用你。有時仲要早少少返工做training,又要做工作評估。嗰個年代應該廿蚊起到最高四十五蚊一粒鐘左右啦。雖然人工唔高,有時早返又無錢收,不過感覺上比而家炒散對公司更有歸屬感,同同事經理嘅感情更深厚 。

而家做飲食炒散,基本上邊度高人工你就畀邊度更,你亦唔需要一定要畀weekend。如果你肯個個星期畀星期五,六,日,間餐廳經理應該會日日攬住你嚟錫,要乜有乜,直升神枱。因為大家都知,而家啲餐廳大粒嘢仲多過Server,有時係連一個長工Server都無,變相下欄工作,e.g執枱、出餐、抺銀器等等無人做。所以,你肯搵一間餐廳長炒,實乃天使下凡,人見人愛。但正因炒散唔需要負太多責任又自知自己需求大,結果又衍生咗好多廢柴Hea人,抱住做又36唔做又36懶到爆嘅心態返工。

其實我自己都算係做炒散出身,我覺得每份工作即使係短期或是長期,都應該認真去做。有陣時覺得大家唔好太短視,覺得炒散咋嘛!咁認真做乜啫!除非你帶面罩返工,用假名同假聲見人,如果唔係每樣你做嘅事,都係代表緊你。認真工作係對自己負責任亦係個人修養。可能你唔介意人點睇你,你又唔係長做,但係每個生活上嘅細節都係重點,有可能衍生到你人生另一個方向點。如果唔係當日我老闆因為我認真工作而賞識我呢位炒散,再了解我大學修設計,再畀我試做佢餐廳嘅海報。我諗我而家都可能淨係傻豬豬炒緊散,唔會發展到有自己嘅設計事業。所以,如果你連咁簡單容易無乜責任要負嘅炒散,都可以做到神憎鬼厭,被眾人視為廢柴。咁我希望閣下反思下自己何德何能去應付日後真正嘅事業或者其他類型嘅工作。

雖然炒散無醫療保障、保險同強積金,但出人工畀長工快,一般會係一至兩個星期出票或者現金。如果只係幫手炒一兩日,公司通常都即日出糧。假期返工時間又可以自己調整,比一般長工自由自在。我建議如果已經做到五勞七傷,關節發炎嘅各位長工飲食朋友仔,可以考慮下take一個半年炒散break。人工可能無而家咁高(可能咋!有機會都高㗎!而家炒散價已經漲升到60-70蚊一粒鐘),但我肯定你心理健康質素會高好多。因為自由啲,輕鬆啲,心理壓力又少啲,仲可以多啲時間陪下家人朋友。我知道喺呢個無乜新血投入嘅香港,做飲食長工真係好辛苦!Take個炒散break,轉換下環境,都未嘗唔係一件好事呀!

嚟緊瑪莉就要離開香港進軍美國炒散界,雖然唔知前路如何,但我都會好好記得曾經喺香港瘋狂炒場一人睇場嘅餐飲日子。我知道喺香港做飲食真係好辛苦,假期少工時長,但隨住要搶人,飲食界嘅薪金同福利都開始不斷上升。如果你真係做得好唔開心,一定要相信自己嘅能力,你係絕對可以搵過一份被人尊重被人賞識嘅工作!希望日後再次返嚟香港,我會見到每間餐廳工作嘅每一位都充滿笑容,擁有一個開心嘅工作環境,而香港亦都唔會再係投訴之都(呢樣最難⋯⋯) 。

Any肥,大家可以上jobsDB搵工平台搵下炒散工,有得揀返工地點,又可以篩選薪酬同工作性質,更容易搵到啱心水嘅炒散位!得閒Loop一Loop睇下幾時開始take個炒散Break啦!

店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。