小毒男護士:有一個護士男朋友是一種幸福
行業小薯「辛」訴:
關於我份工,我想你明嘅係……
《有一個護士男朋友是一種幸福》
by 小毒男護士
女士們,如果你嘅另一半係一位護士,我知道會面對好多問題或者怪事,但都請好好珍惜佢!

《有一個護士男朋友是一種幸福》
做咗護士呢份工作之後,想約女朋友去街好似變到同中六合彩一樣咁難,永遠都夾唔到DUTY。
約星期一食晚餐? Sorry我果日返P,10點先收工呀。
改約下星期日食lunch? Sorry 我果日返A,收四點呀。
再改下下星期六一齊食宵夜? Sorry 我果日返通宵更呀。
約下個月? Sorry…未出duty未知返咩,又唔知request duty得唔得…

《有一個護士男朋友是一種幸福》
喺醫院工作,每分每秒都好寶貴,分秒必爭,所以護士經常都要係安全帶病房飛奔。長年累月下,大部分護士都內置咗呢對每秒十米嘅「飛毛腿」。
「你行咁快做咩呀?」
「行得咁急,你好唔想同我行街咩?」
「我知你行咁快,驚我會停低買野呀嘛!」
女朋友你諗多咗啦…其實只係習慣咗急速嘅步伐,一時間慢唔到啫!

《有一個護士男朋友是一種幸福》
作為一個護士,好容易就會將日常嘅嘢幻想成醫院工作見過嘅核突嘢,然後毫無顧忌咁掛喺口邊。
見到地下有攤水就幻想係尿;見到黏液嘅物體就幻想係痰;見到咖哩色嘅嘢就幻想係…你懂的。
女仔最鐘意聽甜言蜜語,但如果男朋友係一位護士,可能就成日聽屎尿屁痰喇…

《有一個護士男朋友是一種幸福》
眾所周知做護士壓力好大,經常都會搵人呻,所以另一半就係最好嘅聆聽對象。
但假如另一半係行外人,好大機會聽到黑人問號咁嘅樣。要聽一堆完全唔明嘅術語,同時又要講下安慰說話,都係一個幾難嘅task。

《有一個護士男朋友是一種幸福》
Anyway! 比起其他男仔,有個護士做男朋友仍然有好多優點!
遇到女朋友唔舒服,例如胃痛、M痛或者傷風咳流鼻水,好多男仔都只會答:「飲杯暖水啦」,死罪嚟㗎!但作為護士絕對唔會淨係叫你飲暖水就算! 反而可以用專業知識畀到最好嘅建議,有咩頭暈身㷫搵男朋友即刻安心晒!

《有一個護士男朋友是一種幸福》
大部分做護士嘅男仔亦都相對比較細心同溫柔,企企理理,一定唔會成個麻甩佬咁,分分鐘都整潔過女仔呀! 而且仲好識照顧人㗎,病咗唔緊要,有私人嘅護士悉心照顧你!受咗傷唔緊要,有專屬嘅護士幫你包紮傷口!

《有一個護士男朋友是一種幸福》
正正因為工作關係而難約嘅原因,出到街都一定會好珍惜一齊相處嘅時光,一定唔會hea下hea下又一日。

做護士唔只係一份工作,仲係一份責任,就係呢份責任令到護士同時可以擔當好伴侶嘅角色!如果自問有愛心有抱負,又有興趣想成為一個好護士嘅話,唔需要覺得路途崎嶇! 隨時可以到jobsDB平台了解一下護士呢份工作,睇下將來有冇空缺畀你成為一位白衣天使兼好伴侶啦!

點解我咁吹捧男護士? 因為我自己都係囉! 嘿嘿!

小毒男護士
一名90後, 平凡的小毒男
為大家分享做男護士在醫院的日常;D