幼稚園人妻的日與夜:幼師的72變
行業小薯「辛」訴:
關於我份工,我想你明嘅係……
幼師的72變
by 幼稚園人妻的日與夜
各位小朋友,記唔記得老師上堂時同你哋玩過嘅角色扮演?扮小豬、扮兔仔、扮花草樹木……其實老師每日都扮演好多唔同角色,想同你哋分享吓~ 就算你哋依家未係完全明白,老師都希望你哋大個仔大個女再睇返,仲會記得老師呢個角色!

做幼稚園老師唔係淨係有愛心就夠,仲要識同小朋友以及家長溝通。
做幼稚園老師唔係淨係有愛心就夠,仲要識同小朋友以及家長溝通。
雖然平時你哋見到我,大部分時間都係同你哋講故仔、唱歌跳舞、玩遊戲……但其實Miss仲有好多唔同角色㗎!

社工:其實作為幼稚園老師,好多時都要扮演埋社工,幫你哋爸爸媽媽解決唔同嘅問題。
導遊:出外活動、學校旅行時,要喺旅遊巴上同你哋講解介紹。
髮型師+化妝師:你哋有表演時,Miss要幫手set頭化妝,特別係畢業禮。
排舞師:有活動要表演時,要諗舞步。
廚師:定期同你哋一齊整嘢食。
活動設計師:有大型活動要設計同布置攤位。
攝影師:隨時隨地幫你哋影相,記錄你哋嘅成長花絮。
裝修工人:邊度有嘢損爛就要幫手修理吓,以免整親你哋。
採購員:有咩教材/工具/表演道具要買就淘淘淘啦。
電腦員:定期更新學校網上嘅資訊。
文員:處理文書工作、寫教案。
接待員:有大型活動就要不停「你好呀!」、「早晨呀!」。
司儀:唔同嘅活動都要有老師去做司儀負責成個流程。
會計:要收費嘅活動就要計人數、計錢。
清潔女工:有咩污糟、嘔吐就要即時處理。
護士:每日會幫你哋量體溫,有需要要做埋探熱同處理傷口。
運動員:短跑選手,要捉返住長期跑來又跑去嘅小朋友,以免意外發生。
餐廳侍應:每日嘅膳食都係由我哋分發,幫你哋添飯添湯夾水果。
魔術師:隨時變啲糖、玩具、手偶出黎哄氹你哋、吸引你哋嘅視線。

希望你哋大個咗都要記得幼稚園老師呀﹗
希望你哋大個咗都要記得幼稚園老師呀﹗
其實,對Miss嚟講,最難嘅部分都唔係上述呢啲,而係擔心我未能將你哋要知道嘅知識同道理都一一教授,又怕自己未能畀你哋有愉快嘅學習時光。你哋嘅笑容同可愛嘅模樣就係老師最大嘅動力!

Miss希望你哋大個之後,同啲哥哥姐姐一樣,無論做任何工作、扮演任何角色,都可以感受到工作帶比你嘅快樂同滿足感!

如果哥哥姐姐們一時迷途,不妨上jobsDB平台睇下其它行業故仔,或者會發現另一番風景。

幼稚園人妻的日與夜
幼稚園老師唔係淨係教abc同玩bb,期望外界可以重新認識幼師呢一個行業,明白幼師唔易做, 想為學生好呢個目標!已將幼師嘅心路歷程、工作趣事、幼教辛酸,收錄於《港孩的弱點》。