廣告界袋底泥:這夜,我從一碗渣都隔埋嘅湯中尋覓快樂
行業小薯「辛」訴:
關於我份工,我想你明嘅係……
這夜,我從一碗渣都隔埋嘅湯中尋覓快樂
by 廣告界袋底泥
回想起剛剛畢業開始工作,居住偏遠地區嘅山區兒童阿旺(即係我),每日差不多天未光就已經要起身梳洗準備出門口返工。之後一直過住朝 9第二朝 2嘅生活,加埋 weekend OT嘅時間,基本上就無咩機會見到屋企人。我媽成日話,我當屋企好似酒店咁,借住一晚又走。

這夜,我從一碗渣都隔埋嘅湯中尋覓快樂
有一日意外地可以早放,凌晨十二點鐘已經返到屋企,落車後遠遠見到屋企嘅燈仍然著住。

「阿媽你仲未瞓嘅?」

「點呀你,日日都見你無嚟精神咁樣,發生咩事呀?有咩唔怕同阿媽講呀」

「都唔知由邊度講起… 我依家返工日日俾人鬧……」

「吓,你成日做錯嘢咩?」

「我都唔知我做錯咩…我幫公司對客,負責執行嘅同事做錯嘢,我就俾客鬧;
個客自己做錯嘢,又係我俾人鬧;
公司拖人數唔找,收律師信都係寫我名……
同公司講自己嘅無奈,就俾人一句話『唔係出糧俾你做咩』
總之發生任何事都係我俾人鬧,其實我都唔知自己做錯咩……」

「點會咁㗎,人哋做錯嘢做咩要鬧你?」

「係咁㗎喇,好似啱啱有個客,原本同佢夾好要做一個動畫製作,事前先寫好劇本畀佢哋睇,交咗兩轉稿,個客就話 OK可以開始做。原本都以為可以平安無事,點知send畀個客睇,佢寫咗個兩頁長嘅 email畀我逐項列出佢哋覺得有問題嘅地方,但我哋睇返明明就跟足個劇本做,無咩可能係內容出錯……」

「咁你同個客傾吓嘛」

「我有約個客傾吓呀,但佢又左拖右拖,終於突然有日佢直接打去畀我老闆講 『我真係唔明你哋 agency究竟搞咩,有劇本照住做都可以錯漏百出,畀完 comment又隔咁耐都未見到修正嘅版本,宜家我哋真係好唔滿意你哋做嘢嘅態度,希望你哋可以畀個合理解釋我…」

我自顧自一路講,阿媽個樣越來越迷惘。

「算啦,你唔會明㗎啦,都夜啦,我去沖涼先..」

阿媽突然彈起身,一路走入廚房一路講:

「阿媽我真係唔太明你份工係做啲咩,但有啲嘢係我活到呢個年紀好能夠體會到嘅,就係人人都有資格得到快樂,只係睇你有無勇氣去把握,份工做得唔開心嘅,咪搵過份囉,屋企又唔係等你開飯。」

這夜,我從一碗渣都隔埋嘅湯中尋覓快樂
阿媽一邊講,一邊放低一碗熱騰騰,渣都隔埋嘅湯。

「趁熱飲啦,祛濕排毒呀。飲完早啲沖涼瞓啦」

「記得有咩都要同阿媽講呀,阿媽識嘢少,但都撐你㗎!」

一碗平平淡淡嘅湯,那夜零晨飲落份外溫暖。一路飲,一路回想阿媽嘅說話,係嘅,去到邊都好,啲客都係__,但遇到懂體諒你嘅上司仲有同事又另一回事喎,於是,我打開咗手機版 jobsDB,決定重新尋找一個真正快樂嘅小天地。

廣告界袋底泥
“比人日捽夜捽,發揮奴性光輝一面。
展示廣告界滅絕奴性的一面。”