夜班/夜更的士司機故事:老細與老婆的無形鬥爭|我的你的紅的
行業小薯「辛」訴:
關於我份工,我想你明嘅係……
【老細與老婆的無形鬥爭】
by 我的你的紅的
清晨四點幾,喺馬游塘落低乘客之後,竟然有個裝扮整齊嘅乘客截車。呢啲時間多數係玩完返屋企,衣飾好難保持整潔。呢個疑問喺乘客講完去西貢某地方後,我就提出:「好少去玩完都Keep到咁靚仔喎。」年屆中年嘅乘客,對我報以一聲冷笑。

做夜更的士,載咩客多?有時都幾難預料……
做夜更的士,載咩客多?有時都幾難預料……
「哼!玩喎,我都想玩呀。我個樣似去玩咩?要返工,邊有得玩。」四點鐘要返工,真係難免激動。乘客愈激動,我就愈冷靜:「哦,你個樣梗係唔似去玩啦,只係呢個時間,比較少人返工啫。」「師傅你咁諗好正常,最慘係我老婆都係咁諗先大煲。唉,天都未光就要返工已經慘啦,仲要聽埋佢啲單單打打,『又要咁早,個老細GAY㗎,你要去服侍佢呀?』講完就瞓覺,唔關心都算啦,我真係寧願佢瞓覺唔好嘈。」

「四點喎,瞓緊覺都要Stand By,個老細又真係幾衰。」其實我仲想加句「不過你老婆咁都單打你就更衰。」只係大家萍水相逢唔係好熟,有啲真話費事講,講人老細無咩問題,講人老婆隨時反面,就算乘客係鬧緊佢老婆。

乘客稍微沈默,可能係消化緊我嘅說話,又或者純粹唔想理我。隔咗一陣,乘客先組織好佢嘅答案:「呢個老細幾好,係有時會嘔到周圍都係要我清潔,又有呢啲突發嘢要我隨時候命。人工、假期嗰啲全部好好,辛苦嘅時候係好似幾慘,但係老細都識得體諒,反而老婆唔體諒我。有時返到去話好攰,佢就單單打打,話我成日坐喺度嘆冷氣,唔知我攰乜。」

職業司機on call 16小時,唔係喺架車度嘆冷氣等老細就叫get the jobs done﹗
職業司機on call 16小時,唔係喺架車度嘆冷氣等老細就叫get the jobs done﹗
「你做邊行㗎?」以前我會從對話中估算乘客嘅工作,久而久之發現太多千奇百怪嘅工種,或者係聽過但無接觸過,根本唔會醒起,都係直接問算。「我?我揸老細車㗎。」「原來係同行!咁我諗到你點解釋啦。你播條車CAM片俾你老婆睇,唔俾佢瞓覺,唔俾佢去廁所,仲要佢答每部出現嘅車嘅特徵,玩到十分鐘真係乜都得。」要其他人設身處地咁體會到職業司機嘅難處,最緊要係做個環境等佢哋感受下,好似教學咁,直接鬧係無意思。

「哈哈哈,我想呀,唔敢呢。」臨開工前,乘客總算面露笑容。「佢成日以為我坐喺車度涼冷氣好舒服,到我心臟病時咪信我真係會攰囉。」乘客落車時唔單止笑,仲要係苦笑。

職業司機嘅辛苦,只有職業司機本身先體會到。全日坐喺度對身體嘅負荷,比每日出賣勞力來得更加大,老細嘅飄忽亦都唔係咁容易掌握。好在私人司機多選擇,一打開jobsDB真係豐儉由人,咩老細都有,自己揀個啱嘅,老婆就話揀咗無得轉,老細年年都可以換,最緊要自己做得開心。
我的你的紅的 – 白告
80後中文系畢業生,身兼的士司機及網絡作者。《我的你的紅的》Facebook page作者。