90後銀行小妹甩轆記:《入"行"需審慎!銀行筍工的迷思》
行業小薯「辛」訴:
關於我份工,我想你明嘅係……
《入“行”需審慎!銀行筍工的迷思》
by 90後銀行小妹甩轆記
致 畢業生們:

銀行工係咪人工高、福利好、穩定而又有work life balance嘅筍工?只可以話銀行有好多部門可能係,但做分行一定唔係!一直以來,有唔少人問我點解開呢個page,又問我究竟去唔去做分行好?以下係一般Fresh Graduates對呢行嘅迷思,睇完之後,相信大家會有答案:

《入行需審慎!銀行筍工的迷思》
朝九晚五 好爽皮?
分行係就係九點鐘開門,但實情分行職員需要8點半甚或8點已經要返到去準備、開早會等等。

五點鐘閂門之後,一般會先處理番日頭嘅所有文件,有時候要去上Training、開捽數大會,無八九點都唔駛旨意走。

銀行工 = 穩定?
的確做中資行會比較穩定,但呢幾年分行都追求更多非利息收入(例如賣保險/投資產品),基本上全民皆兵,上上下下都要跑數,分別只視乎孭數額大小。至於唔到數者,唔係被炒就係自行執包袱,所以時常轉工係常態。

《入行需審慎!銀行筍工的迷思》
工作好輕鬆?
未入行之前經過銀行,會見到啲職員行行企企好似好輕鬆咁。入咗行之後先知,行嚟行去係處理緊客戶文件,因為要俾營運部同事覆核。平時基本上係不斷「輪街症」,摩打手咁接客。食飯時間係唔同同事輪住食一個鐘,忙起上嚟連飯都食唔到,可以話食無定時。

做銀行好威威?
以前嗰代覺得做銀行有「光環」,客人係需要「求」銀行職員批貸款。可惜時移勢易,自從銀行水浸之後,調番轉係銀行職員求人借錢,相信你哋都會接過貸款宣傳電話。

唔單止貸款,就連其他服務,例如保險、投資,都開始要職員「力Sell」。我仲好記得當年入職個Trainer話「大家同街口個街霸(拉晒Banner嘅電訊Sales)無分別」,而家諗番只能表示不能同意更多。

《入行需審慎!銀行筍工的迷思》
人工好高?
做分行Sales,剛畢業入職起計,而家大約有一萬七八。比起做其他行業嘅朋友仔,例如廣告,甚至Big 4,都可能略高,但跑數壓力非常大。隔幾年做到客戶經理,底薪去到兩三萬,計埋佣金,一個月六七萬不是夢,前提係要「到數」。「到數」嘅難度有幾高?就好似DSE攞5**差唔多。

講咗咁耐,我有冇後悔過入行?冇!

因為做過前線嘅經驗好難得,我相信日後做其他部門都難唔到我,而且分行嘅經驗對於去其他部門都係一個好好嘅Stepping Stone!睇咗咁耐,如果你心入面已經有答案,不妨去jobsDB平台再審慎選擇一下?

日日甩轆的銀行小妹 上

90後銀行小妹甩轆記
一個90後銀行跑數妹,分享每日於分行上演的奇趣事。