防伏措施:由apply去到見工 360度睇呢啲辨別伏工

防伏措施:由apply去到見工  360度睇呢啲辨別伏工
Jobsdb content teamupdated on 22 November, 2018
Share

職場係弱肉強食嘅殘酷森林,想話搵份心水好工,由睇到請人廣告開始,已經係陷阱處處,一個唔小心,唉呀……份工中伏中到應一應呀﹗所以搵工前,先睇下呢篇「防伏」文先啦﹗

搵工時:睇招聘廣告,踢走偽筍工

老是常出現請同一個post嘅廣告背後,暗藏份工難頂,員工流失如車輪轉的警號。亦勿被「彈性工作時間」、「毋須經驗」、「高薪厚職」等字眼誘惑,試問邊有咁大隻蛤乸隨街跳,警訊早有溫馨提示。

一人一伏示:「有啲工成日都請人,其實都知咩事啦!一係就turnover rate勁高,一係就呃CV或者想套料,唔好以為嗰啲連公司email都冇嘅蚊型公司先會做呢啲﹗大公司都有用呢啲下三濫手段去呃CV,甚至進一步呃proposal。」打工仔Aaron提提大家。

見工時:睇機構任何「仁」,留意未來同事好與壞

去到見工階段,除了向面試官/未來上司問清楚工作範疇、人工福利等要項,仲要留意其人嘅溝通能力同友善程度。連receptionist與其他員工,總之anyone都要趁機觀察,究竟有無禮貌、衝勁十足定冇厘神氣,事關工作氣氛唔對路、同事騎呢卸膊,勉強合作無幸福。至於七天annual leave的公司就自行考慮做唔做得過﹔最後,去到尾聲如果人事部壓你人工,原因係你嘅資歷或學歷未如理想,不過佢哋願意俾你一個機會。呢個時候,請再三思。

 一人一伏示:「有間港資中小企星期三晏晝五點打嚟叫我第二朝去in,雖然覺得急,咁諗住自己都得閒咪去囉!之後收到佢send過嚟嘅confirmation email,寫"if you ok, please reply confirm."文法求其,似有伏味。去到in真係連reception都冇,有個似係做admin嘅嚟開門,叫我等陣,一等就半個鐘⋯⋯間公司做嘢咁鬆散同求其,會幾有前景呢?」已搵到好工嘅Andrea表示:懷疑,就要say no。 

▪【最下流職業】古代九流工種穿越到現代,化身邊一行?

▪【飛行服務隊】政府機師及空勤主任談空援救災,感言:「很有意義﹗」

見工後:睇辦公環境,又玩又食未必盞

可以的話,見工時順道一遊pantry、廁所等公眾地方,望下環境啱feel與否。潮興開放式辦公室,同場加映玩樂設施如乒乓波枱,兼免費零食汽水任攞,確實吸引。但公司free到盡頭就會chur──講求員工自律、創意同工作績效,絕非hea玩而交唔出功課人士想像中嘅樂園。而必須專心辦公,需要私人空間嘅內向型打工仔女,更要認真考慮open office係咪自己嘅style。

返新工時:睇實戰,做落見真章

滿懷歡喜向新工報到,但櫈都未坐暖,已聞到陣陣伏味……

1.職銜名不副實

雖然見工時講過做乜,做落至知title與工作性質不相稱。明明職銜標明資深高級,卻變了一眾「前輩」同事嘅junior雜工。講明做助理總經理,原來係總經理嘅近身秘書,只係跟出跟入;好多保險公司或金融機構請文員、市場助理等職位,實質係做sales。甚至有雜誌編輯被上司要求見客跑數,中伏中到應。

2.開會狂魔

邊一個發明了開會?公司文化就係開會,同組開、跨部門開,更有全公司大會。會上人人變身岳不群、任我行、獨孤求敗……唔係互望冇聲出,就係互插無面俾,仲要臨近食lunch同放工時至嚟開馬拉松會,聽到「散會」就皇恩浩蕩,然後,今次未解決的問題,下回繼續!個人積壓嘅文件project,當然係用開會以外時間趕貨,即係開OT。

▪ 打工仔之苦!節日早放、返放工塞爆全因這個問題 香港最塞車喺邊?

▪【自由有價】周未freelancer你估易做㗎?看似自由 實際工時長

3.WhatsApp分享症

上司鍾意開WhatsApp群組最攞命,方便佢隨時隨地以電話傾公事,放工放假都可以搵到你,遙控發出工作指示,又不可以「已讀不回」兼不能quit,點都要應酬下佢。加埋上下級同事、公事上來往關係者,一個人攬住十幾廿個即時通訊group唔出奇,啲工作訊息排山倒海此起彼落,去到邊都要低頭覆訊息,變相「隱形加班」,仲要永無放工,極之影響私人生活。

Plus: 俾petty cash有遲冇早嘅帶錢打工伏、坐正係廁所門口同影印機隔籬嘅風水伏、唔俾叮飯一定要出街食lunch兼鎖大門嘅不信任伏……

 一人一伏示:「畢業後啱啱出嚟做嘅第一份工,勁伏!得七日大假,但唔可以連住紅日攞假;老闆好鍾意鬧人,最鍾意踐踏新人話佢哋唔夠料;公司文具要以物換物;冇任何茶包、咖啡提供;食飯時間嚟開會(經常);最最犯眾憎係放工經常要強制留人喺公司做啲乜乜training,做咗幾個月就走咗。」前伏工苦主Kar難忘刻薄僱主。

解伏還須中伏人:綜合衡量公司規模、工作前景同個人志向,為份履歷好睇啲而忍,做多一陣。情況太惡劣者,閃為上着。到底良禽擇木而棲,魚唔過塘唔會肥。

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Career development

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.