乞客:優質經理唔易做之五大條件!

乞客:優質經理唔易做之五大條件!
Jobsdb content teamupdated on 09 February, 2019
Share

經理而家真係一街都係,去餐廳挽下手經理多過Server,但其實經理唔係話做得耐就能夠勝任。好多餐廳老闆以為升職可以留人,但其實升咗職反而令你餐廳走嘅人仲多。要做一位令人佩服嘅上司,唔單只要識基本公司嘅職責,仲需要有領導才能同合適嘅性格,真係唔係咁容易。以下係五個優質上司會有嘅基本才能,睇下你而家位上司算唔算好上司?





Jobsdb向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱Jobsdb引才法則 (Laws of Attraction) 互動網站的按需分析。

 

1.懂平衡工作氣氛,情緒智商高

曾經有一個經理,我非常敬重,有才能得嚟又玩得。但工作時大家都會忌佢三分、十級尊重。喺佢嘅領導下,公司位位工作愉快,有Standard跟從,有效率。但同時都有啲上司無論喺任何時候都經常黑面臭脾氣、有彈無讚、以自己大粒嘢自居。其實唔好以為人人覺得你咁樣有威嚴,尤其喺呢個世代只會令人生厭,炒散炒完一日都唔會再想撈。一位上司營造唔到良好嘅工作氣氛,亦都唔好講有咩領導才能,因為都無人想跟你做嘢。




 ▪ 5個跡象顯示你有一個好上司

2.同撈同捱,不以上司身份作懶惰藉口

雖然做得上司都會忙好多下屬幫唔到手嘅工作,但作為一個餐飲業嘅上司,喺On floor嘅時候,少對手就真係少對手。有啲經理覺得執枱、出餐呢啲低下層嘅工作唔應該做,但從來唔諗下公司經理嘅比例、亦無考慮過下屬嘅感受。當然唔係話經理唔通幫你日日執枱做下欄嘢咩?但適當時候嘅協助,係會令下屬感受到大家係一齊同撈同捱,留人就梗係要留心先啦。我真係見過啲經理炒檔時夢遊,炒完時全場枱未執,最唔累嘅佢已經坐咗喺度食嘢飲嘢休息,由得嗰兩位Server冧晒檔虛脫地執枱。係呀~升到經理仲同你捱咩!係經理呀~但唔係好嘅經理/上司囉。

想試下做餐飲業?餐飲筍工撳呢度﹗

餐飲界主管

管飲管食

大廚小廚

 

 

3.對客定老闆,都有吉屎(Guts)

有吉屎嘅上司,會識拒絕老闆損害員工利益/公司利益的建議- 如半價時段/減人手。雖然老闆真係大晒,就算老闆要Cut人減成本,作為老闆嘅下屬,就算反對都無乜用。但即使係咁都應該向老闆表明風險同後果,就算最後失敗都算有盡力反對過。而有吉屎嘅上司,亦都唔會因為討好乞客而犧牲同事嘅自尊。

▪ 乞客:我唔知你知唔知嘅餐飲業小知識


4. 應變能力高、有領導才能


每日餐廳應對嘅客人都唔同,處理嘅事情當然都會唔同。除咗老闆突然來襲無預兆、客人無理投訴、下屬倒瀉菜式等等比較容易處理嘅突發事外,有時候仲會發生一些令公司聲譽嚴重受損或者涉及安全問題嘅突發事,如飛天老鼠、爆大水管、停電或火警。作為一個應變能力高嘅上司,就能夠快速提出應對方案,領導下屬協助處理突發事,以確保同事與顧客安全嘅同時,亦令公司損失減到最少。

 ▪乞客:餐飲人的六個絕技

5.接受意見,願意承擔錯誤

無論係幾有本事嘅人都會有需要改進嘅地方,做上司都唔例外。市面上都有好多俗稱老海鮮(老屎忽)嘅員工,經常忽略下屬嘅意見,認為自己嘅一套就係對公司最好,可惜唔知道而家已經係2019年唔再係1999年。或者有啲上司係怕下屬有一日會超越自己上位,所以面對著好嘅意見都視而不見,一一say no。而好嘅上司,會接納有用同有效率嘅意見,即使意見係來自下屬。自己有不足或犯錯,都會願意承擔,而非卸膊落下屬。



 ▪ 乞客:5個餐飲界朋友應該離職的原因

你的上司如何,你的日子也必如何。瑪莉咁耐以來都係遇過一位集以上五大條件嘅好上司,可惜佢都唔再做飲食業啦。如果你遇到一位好上司,真係要好好珍惜同佢講句"Thank you﹗"因為咁好嘅上司⋯⋯真係唔係成日可以遇到,有啲人可能一世都未遇過!#sosad

店小二Mary

90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。

 

檢視此作者的所有文章

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Industry stories

Browse top search terms

Did you know many candidates preparing a resume also research their industry by exploring top search terms?

Subscribe to Career Advice

Get expert career advice delivered to your inbox.
You can cancel emails at any time. By clicking ‘subscribe’ you agree to Jobsdb’s Privacy Statement.