乞客:我唔知你知唔知嘅餐飲業小知識

乞客:我唔知你知唔知嘅餐飲業小知識-1

今日同大家分享一下一啲我唔知你知唔知嘅餐飲業小知識,等無論做侍應定客人嘅你都對呢個行業有深入啲啲嘅理解。

jobsDB向全港二十個行業包活資訊及通訊科技界、教育及培訓界、廣告、媒體及出版界、互聯網及創企、飲食界等六千名從業員發出問卷調查,深入發掘他們對工作的期望。欲知更多香港打工仔的訴求,可參閱jobsDB引才法則 (Laws of Attraction) 互動網站的按需分析

 

A.餐廳唔一定要供應免費飲用水

早排瑪莉好奇心發作,記得之前做酒吧畀個外國客人嘈過我唔畀飲用水屬犯法,所以向香港食環署問咗兩條問題,最後得到答案。

1.餐廳 / 酒吧 是否有責任提供「免費」飲用水給客人飲用?餐廳 / 酒吧其實也有出售支裝礦泉水。如餐廳/ 酒吧拒絕給予客人「免費」飲用水是否違法?會否被票控?

答案:現時香港法例及食肆的牌照條件並未規定食肆需要向顧客免費提供飲用水。

2.大多餐廳 / 酒吧水龍頭也沒有安裝過濾器,是否安全給予客人直接飲用?

答案:所有香港食肆食水水質均符合香港食水標準,所以無安裝過濾器都係可以畀客飲用。

雖然有網友提及其他國家無畀飲用水屬犯法,但喺香港,餐廳/酒吧係唔一定需要提供免費水畀客人。所以,如果餐廳願意畀水你要多謝人,因為間餐廳真係可以叫你買水,買佢啲水喉水㗎。

 ▪入行28載,半島酒吧侍應如何一步步攀至餐飲部總監?

 ▪50句飲食業者最憎嘅麻煩客說話,你聽過幾多句?

B.香港有法例禁示狗隻進入食肆

根據香港法例第132X章 《食物業規例》:

10B.禁止狗隻在食物業處所內出現

(1)任何人不得將狗隻帶進任何食物業處所內。

(2)任何從事食物業的人不得明知而容受或准許狗隻在任何食物業處所內出現。


(3)本條不得解釋為禁止為完全或局部失明的人充當嚮導的狗隻在任何食物業處所內(食物室除外)出現,或禁止與行使一項合法權力有關的狗隻在任何食物業處所內出現。

如果餐廳容許狗隻喺餐廳出現(導盲犬除外),而畀人告發咗,一經定罪,最高可被判罰款10,000元及入獄3個月。所以,餐廳拒絕狗隻內進,並唔係歧視你隻狗,希望客人可以理解。

此外,曾經有客人好怕狗仔、驚畀狗咬等等,而想禁示視障人士帶佢隻導盲犬入去餐廳。其實除咗《食物業規例》容許導盲犬入內外,《殘疾歧視條例》(第487章)亦有例明任何人士如拒絕視障人士攜同導盲犬進入容許公眾人士進入的處所,或拒絕向他提供服務或設施,則可能被視為觸犯《殘疾歧視條例》。 



其實所有導盲犬都有經過訓練、而且非常乖巧同唔會打搞人。如果客人仲係好怕狗,唯有叫侍應幫幫手,可以的話就轉個遠少少嘅位置。

 ▪乞客:餐飲人的六個絕技

 ▪乞客:小費去哪兒?

C.切餅費同開瓶費包含多項隱藏服務



好多客人以為淨係開同切呢個動作就要收成幾十幾百蚊覺得唔值。其實收取切餅費同開瓶費主要嘅原因除咗係防止客人外帶食物、推動餐廳消費,當中亦包含多項隱藏服務。

  • 切餅費

    1. 佔用雪櫃空間:雪藏蛋糕已經佔用咗雪櫃嘅空間,亦對一啲雪櫃唔大嘅餐廳,帶來工作上嘅不便。
    2. 為生日客人抽空特意準備驚喜、如:聽邊位指令先上蛋糕、留意主角動態、協助飾品加插喺蛋糕等等。
    3. 清枱及放置甜品餐具。
    4. 動用廚房師傅時間分切蛋糕。
    5. 清潔額外甜品餐具,或協助打包餘下蛋糕。

    有啲更熱情嘅餐廳仲會動用所有員工同你大唱生日歌,又熄燈又拍晒手。其實即使客人唔需要切,最低限度都會用到餐廳個雪櫃或者餐具。就算唔雪唔用餐具唔切拎手食,客人喺餐廳享用非餐廳食物,佔用座位阻礙餐廳翻枱,咁個切餅費咪當係留位費囉。
  • 開瓶費

    由開酒、透酒、準備酒杯、轉酒、換酒杯、斟酒等等都係服務。就算客人支酒係扭蓋,都需要使用餐廳嘅酒杯。某啲高級餐廳酒杯嘅價格更可能高達$500一隻,餐廳每次特備開箱使用酒杯都需要承擔碎損嘅風險。有啲餐廳你叫一支佢哋酒牌嘅酒,會豁免你一支嘅開瓶費,最平嘅紅白酒$300-400。如果一大班人自己帶嘅酒唔夠飲又唔想畀開瓶費,可以考慮問吓餐廳可否買一支酒,免一支開瓶費。呢個做法,餐廳又有錢賺,你又可以多啲酒飲。
店小二Mary
90後大學設計系畢業,任職餐飲接近10年,初初做飲食純粹玩吓做吓炒散,到試過做office工,反而鍾意做返侍應。10年嚟serve過唔少經典麻煩客人,故開設FB專頁「乞客The Beggar in the Restaurant」,分享餐廳搞笑事及職場嘅各種心酸屎。

閱讀:

乞客:優質經理唔易做之五大條件!

乞客:餐飲界猛人轉工之三大Steps!

點解餐飲業咁難請人 茶餐廳老闆娘狂呻:「而家啲人鍾意炒散多過全職﹗」

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案