如果你係返緊朝9晚6嘅文職，咁office 呢個地方大概就係你「第二個家」。而辦公室入面芸芸眾生，可以係carry你準時收工、並肩作戰嘅「神隊友」；亦都可以係令你返工慘過落地獄嘅「豬隊友」。所謂急急如律令！今日貧道嘅「Office八卦鏡」一開，為大家照亮職場，各奇人異士統統現形，報上名來！！
「嚇人」永遠是對的！
坐喺office嘅你，除咗要對著一班千奇百怪嘅同事，更加有可能要面對各式各樣嘅顧客！不論係隔住個電話嘅back office，定係需要面對面溝通嘅front line，唔少行業都會接二連三受到「嚇人」嘅衝擊！
怪客驚現！總之就係好奇怪！
有朋友任職CS，對客溝通就係佢嘅日常工作，每一日都要盡心盡力去解答客人嘅疑難。可能呢位朋友真係非常上心而且有耐性，令到電話聽筒另一邊嘅客人十分滿意，個客竟然出口邀約CS朋友出街話要請佢食飯，仲要問佢結婚未；CS同事當然係哭笑不得，但係仍然保持專業，對客人嘅邀約一一婉拒！
又有朋友喺酒店back office做，經常有客人催促交房已經見怪不怪，但係有次中午時候，有個客不斷要求即刻畀房佢，問多兩句原因佢就好激動咁話︰「我就嚟瀨屎啦！你畀間房我啦！」聽到嘅人都忍住唔笑，難為負責嘅前台同事仲要向佢解釋，酒店內有其他洗手間可供使用，但係個客仍然堅持要提早拎房用佢嘅私人廁所。為咗保障其他酒店顧客嘅安危，前台同事只好忍住笑咁畀佢check in……先生，需唔需要提供埋廁紙畀你？
▪ 酒店返工怪事：騎呢住客無奇不有！3大最估佢唔到瘋狂行為係……
惡客駕臨！避無可避！
怪客雖然騎呢，但至少提供到笑料畀大家輕鬆下，但係如果遇到啲橫蠻無理、毫無禮貌嘅惡客，就真係辛苦一班服務業嘅同事嘞！
CS朋友又向我爆料，有次公司嘅網上購物平台出現問題，成個system死咗機，IT部同事已經盡力搶救。而呢個時候就有位至高無上嘅尊貴客戶打去熱線，質問點解個系統用唔到，CS朋友耐心解釋，但係呢位客戶仍然不滿，要求CS每15分鐘就打電話畀佢一次，報告維修進度，直至系統用得番為止。而每次打去，呢位客人都不斷鬧CS、鬧系統、鬧間公司……其實……IT部維修緊，就算我每秒同你報到都唔會令件事快咗㗎……放過我啦大佬！
▪ 為Upgrade可以去到幾盡？空姐：「有客話剛割包皮、有客要求吸多啲氧氣。」
又有朋友嘅公司提供求婚服務，會出租車隊、樂隊等等畀顧客，進行一次浪漫又甜蜜嘅求婚行動。有次呢位CS朋友接到投訴，要求退款。原來係一位外國客人買咗個套餐，滿懷信心滿懷希望諗住踏入人生新階段，點知求婚當刻畀人請食檸檬！！錢就畀咗，又抱唔到愛人歸！唔通怪責彼此之間嘅愛唔夠深咩？梗係向間求婚公司發難，要求退款啦！個客肯定心諗︰喂！我畀得錢你做生意，你唔係guarantee我一定追到佢嘅咩？仲唔refund畀我？呀先生，如果你娶咗個女仔發覺佢好難頂，咁可唔可以要求退番啲禮金？又如果你老婆入院生仔，養大個仔先發覺佢好不孝，又可唔可以向個婦科醫生要求退款？好心咁大個人，提出無理要求之前就反省下先啦。
結語
香港向來有旅客之都嘅美譽，標榜以禮待客，用心服務；但係由唔知幾時開始，就慢慢演成變一句「客人永遠是對的」。呢種將客人推向至高無上嘅想法，慢慢孕育出一班古靈精怪、態度惡劣、不斷提出無理要求嘅「嚇人」，變態個案真係不能盡錄。客人係人，服務業嘅仝工又何嘗唔係人呢？當我地要求員工保持專業態度，作為客人又係唔係都有責任，去保持禮貌同埋理性，達至互相尊重呢？
此文章由原作者及jobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及jobsDB保留採取法律行動的權利。
