此日期最佳：2020年辭職黃金日 邊個月只需返17日？
哪一天是遞信的最佳日子？一般會考慮哪一個月份最短，以及放到最多公眾假期，又或「安排」last day在星期日，讓返五天工作週的你可以提早在之前的星期五last day。接下來為大家在2020年每月挑選了一個遞信好日，看看是否適用於你。
留意事項：根據《僱傭條例》，如員工與僱主簽訂之僱傭合約沒有明確規定離職通知期，則通知期應不少於一個月﹔而僱員在完成試用期（一般公司採用三個月試用期）的連續性合約後，便需要向僱主發出不少於一個月通知期的終止僱傭合約通知。
一個月通知期指由發出終止僱傭合約通知當日起計，直至下個月同一日的前一日﹔若發出通知信當日是一個月的最後一日，則最終受僱日為下個月份最後一日。但大家需要注意，最終受僱日不等同於一般辭職信上的「生效日」﹙Effective Day），「生效日」的計算方法是在最終受僱日的後一天。
以下辭職最佳日期將以「一個月通知期」（One-month notice）計算：
辭職最佳日期：1月3日
在新的一年，如果想辭職的話，1月3日是一個不錯的選擇；既可放埋農曆新年假期（1月25、27-28），last day 在2月2日剛好是星期日，五天工作周的你，返埋1月31日就可以提早完成任務了。對自己好D，返少五日，多享受五日生活。
實際上班日：19日（5天工作週，下同）
辭職最佳日期：2月3日
2020年的農曆新年在1月，加上今年是四年一次有29號的2月，2月沒有了辭職的優勢，即使這樣，應該也無損大家辭職的決心。已穩袋花紅的你又想火速辭職的你，不妨考慮2月3日年初十就遞信，3月2就走得，當新一年送自己一份大禮。
實際上班日：21日
辭職最佳日期：3月6日
3月同樣不是一個適合辭職的月份。既沒有公假，而且是大月（有31日）。如要辭職就愈早愈好，3月6號星期五是不錯的選擇，last day在4月6號星期日，即係返埋4月3號可以甩身，賺到兩日都好丫。
實際上班日：21日
▪ 辭職後資方留手尾：拖佣、欠Claim錢、未清假……打工仔如何依法了斷？
辭職最佳日期：4月3日
走過了兩個不利辭職的月份，終於迎來了辭職的的吉月。忍了兩個月，4月3號遞信就再好不過了。中間可以放埋清明節（雖然在星期六）、還可以放齊復活節、佛誕及勞動節，返少幾日工最實際，諗下都和味。原本last day在5月2日，但剛巧是星期六，而數前又撞正佛誕及勞動節，last day變相在4月29日星期三，能夠在一星期的中間鬆人都咪話唔爽。
實際上班日：17日
辭職最佳日期：5月8日
5月冇咩公眾假期可夾，5月1號又剛巧是勞動節，放假不能辭職，惟有蝕少少在5月8號遞信，last day在6月7號星期日，即返埋6月5號走得，都叫做賺左兩日，好過冇啦。
實際上班日：20日
辭職最佳日期：6月5日
如要在6月辭職，建議忍到5號才遞信，中間放埋端午節及回歸紀念日，last day在7月4號星期六，即返埋7月3號離職，賺三日埋單走人。
實際上班日：19日
辭職最佳日期：7月3日、8月7日
7月及8月既是大月，又沒有公眾假期，是連續兩個不利辭職的月份。不過真係頂唔順要走的話，還是建議選月初的日子。所選兩日都是星期五，遞信後爽歪歪，可真正享受Happy Friday，而兩個遞信日子的Last Day都在星期日，賺唔到公眾假期，都起碼賺個周末。
實際上班日：21日、21日
▪ 【紅日返工悲歌】補錢不能取代補假？勞工處規定僱主必須這樣做……
▪ 搵到工、照顧家人、轉行……為5大離開理由度身訂造的英文辭職信(resignation letter)
辭職最佳日期：9月4日
要在9月揀辭職吉日的話，都係睇住國慶同中秋假期。9月4號遞信既可放埋以上提到的兩日假期，last day剛巧又在星期六，推前又是公眾假期，返埋9月30號就走得。月頭遞信，月尾鬆人就是這麼簡單。
實際上班日：19日
辭職最佳日期：10月9日
10月第一個工作天已經是5號，但想辭職的你忍多幾日，忍到星期五（10月9日）先好遞信呀！計過度過，9號遞信可以放埋重陽節假期，last day剛巧又在星期日，即返埋11月6號就可以功成身退。要辭職的話，真係返少一日得一日呀親。
實際上班日：20日
辭職最佳日期：11月6日或11月30日
要11月辭職的話，忍唔到就11月6號，忍得到就11月30號。在前者遞信純為早走早着，last day在12月5號星期六，早一日走得都只係賺到一日；但如果可以忍到30號，就可以賺埋聖誕假期。知道在普天同慶的日子後就可以甩難，真正歡渡佳節呀！
實際上班日：21日、21日
辭職最佳日期：12月4日
踏入12月，holiday mood極之濃厚，適宜在月頭就為自己好好打算。4號是不錯的辭職佳日，可享受聖誕假之餘，仲可以放埋2021年的元旦。乜last day又係星期日咁橋？！咁即係12月31號除夕last day，走前記住聽返首《Auld Lang Syne》應一應景，同過去好好道別。
實際上班日：19日
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
