黑心商店︰恐怖大王……你老細!(下)

剛剛過咗骨嘅2019年尾聲,大家當然唔係咁輕易就碌過去啦!上集提到偉大又英明嘅老細會用盡一切能力去掌控員工,今集會再同大家深入探討老細嘅三大超能力︰挑撥離間、吸金大法同埋身心操控嘅秘技!

成日話工種會俾AI取代,其實另一面佢都幫緊大家製造就業機會,減人同工錯配機率﹗呢件事係點發生?去片解畫啦﹗

無風起浪搞屎棍;挑撥離間猛撥火!

有人話如果返工遇到一班傾得埋又玩得開心嘅同事係莫大嘅福氣!當然老細見到呢個情境都會好欣慰,但係最怕各位同事將感情放晒係同事之間嘅關係上面,所以適當嘅時間會出手又出口,令到大家專心返係工作上面,將對公司嘅愛永遠放喺第一位!

話說當年返工成班同事年紀相若,已經好多話題,平時放假都會約埋出嚟食吓buffet 打吓邊爐;係工作上更加係非常合拍,Support 嘅同事細心地支援Sales,Sales 同事亦都不拘小節,經常請大家食嘢;而係房入面嘅老細一直都運用「天眼」mon實大家,當佢見到呢個畫面,就梗係要約同事入房傾下計先啦!了解下大家嘅工作情況,又再批評吓大家做嘢做得唔好,再逼你要承認係自己嘅過錯……你以為咁樣就完結?老細認為有位勞苦功高嘅Sales同事實在搵得太多,於是一而再再而三咁問其他同事︰「乜你唔覺得佢搵太多呢咩?」哇大佬,你地勞資雙方傾咗個人工嚟,你嚟問返我佢係唔係搵得太多?你想我答咩先?係唔係想我中你嘅圈套,一齊去鬧爆個Sales 太叻搵得太高人工食晒公司嘅錢?眼見大家關係好但係自己埋唔到堆,就用呢啲陰毒問題去挑撥是非,令到同事關係變差,到頭來對間公司有咩好處?唔好意思呀老細,呢啲問題我真係睇唔透亦都唔識答……

▪ 上司10大乞人憎行為:偏心、假民主、臨收工先嚟料 小薯怨聲停不了

▪ 遞咗信就冇煩惱?留意合約上的魔鬼細節 勿向老細透露新動向

以為返工淨係出力?吸金大法教你貼錢打工!

「食君之祿,擔君之憂」,作為一個打工仔,可悲啲講收得人工預咗受氣,老細有時嘅管理方法太過特別都唯有頂硬上。但係有時如果要打工仔貼錢返工,對老細又要送禮物、又要夾錢益返公司都咪話唔嬲!話說有朋友係返服務性行業,頂頭阿姐不嬲都係好有性格,貪小便宜、講嘢刻薄不在話下,仲要成日弄權去為難同事。呢個部門一直都欠缺一部雪櫃,令到大家都無辦法帶飯,長年累月只可以出街食。去到有一日大家真係頂唔順,就同阿姐講不如問公司拎budget,批錢買部雪櫃,等同事可以雪午餐盒或者飲品之類啦!點知呢位阿姐竟然同下屬講,如果你哋要雪櫃嘅,就自己夾錢買啦!公司係唔會出錢㗎!班同事聽到超嬲!但係大家都只係敢怒不敢言,因為眾人都好清楚阿姐講得出咁涼薄嘅說話,係真係會做得到……於是大家只好死死地氣夾錢,買咗部平雪櫃……大佬,咁啲光管、冷氣又需唔需要同事自費夾錢買?我叫呢位朋友唔做嘅時候,一定要拎返隻雪櫃門先好走,千祈唔好蝕咗俾阿姐!好啦,買雪櫃都算啦,係同事自己比錢可以一齊用;但係到咗阿姐生日先見真章!阿姐生日前一個月就已經打鑼打鼓咁同哂全個部門嘅下屬講,自己幾時生日、叫大家預備禮物、亦都講明自己今年唔想收到咩禮物……打工打到咁可憐,要出埋錢去娛樂老細真係好陰公……唯有安慰朋友當自己破財擋災、小財唔出大財唔入,快快手搵返新工好過!

▪ 【職場癌細胞】看old seafood如何點金成石,將人才變庸才

▪ 你的「主子」如何,你的日子也必如何﹗了解上司性格將事半功倍

終極傀儡術!做得員工就身心都係屬於老細嘅!

經歷咗九九八十一難,受盡老細貼心嘅教導,大家係唔係都領略到一個道理?沒錯,你一日出得糧,一日條命就係屬於老細!不論你嘅肉體定係心靈,全部都屬於老細所擁有!有位朋友曾經係個好例子,就係帶飯(又係帶飯) 返公司食,叮完盒飯熱辣辣香噴噴,食物嘅香味洋溢係辦公室入面;結果老細就下令,唔準同事帶「有氣味」嘅食物返工食!無錯!老細覺得唔鍾意就係臭!覺得臭你就唔準食!再嚟多個,話說有朋友嘅老闆突然去上坊間俗稱嘅「自信班」,話自己上咗堂充滿自信,領導才能突然三級跳,都好想同事可以去上堂,仲係開會期間要大家交個名出嚟;先唔講呢啲課程嘅成效同優缺點,咁學費呢?老細咁比機會大家學習,就當然係自費啦!老細今鋪唔單止將吸金大法發揮得淋漓盡致,仲要求大家係佢嘅領導下改造人格,成為一班精英!我地俾啲掌聲偉大嘅老細!當你以為自己出必殺技,諗住劈炮唔撈炒老細魷魚?朋友係台資公司嘅經歷話比世人知,你係唔會鬥得過老細!某間公司因為經營不善,導致一日入面有三個人都想辭職︰第一個入房向老闆遞信後,老闆已經大失預算,心情極差;第二個同事遞信後,老闆直頭係暴跳如雷!打開房門拍枱大叫︰「唔准再有人辭職呀!」咁第三個準備辭職嘅同事點算呀?我都唔知呀……希望佢吉人自有天相,好人一世平安啦!

結語

過去一年,黑心商店好勞幸可以同大家歷盡高低,以《Office 八卦鏡》照出辦公室入面各種奇形怪狀嘅人,見盡大小不同嘅奇聞,今次以偉大、全能、至高無上嘅老細作為最終章,簡直係為我地呢個題目畫上完美嘅句號!希望各位打工仔可以係職場繼續乘風破浪,日日準時六點收工!

 
黑心商店
香港90後,熱愛繪畫及恐怖片。於2016年創立Facebook Instagram 專頁《黑心商店》,以黑色幽默 + 香港文化的恐怖插畫,為忙碌的香港人帶來一點歡樂。#重口味 #喪屍 #妖魔鬼怪 #香港文化 #haksumshop
 
 
 

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

The most-talked about topics 

Scroll to Top