在職媽媽很艱難啊，無時無刻都要平衡工作和家庭，一人充當兩職，在公司做好個人職責，回到家又要照顧孩子和豬隊友。更別提最近細路停學在家自學，對於媽媽而言，更加係火上澆油。小編邀來4位好友媽媽聚會，一人一句大吐苦水，紛紛感嘆：「無端端多咗份工，做埋老師，又激氣又無奈！」
「要做功課，變咗自己教一次囉⋯⋯」 —— Viann
背景：現時在大公司行擔任行政經理（Admin manager ），囡囡8歲，今年讀小三。
Viann自從1月尾開始了在家工作，1星期5日，「新年期之後，公司好快有反應，即時安排work from home，我都幾開心，諗住可以hea吓，又可以陪吓小朋友。一開始都真係輕鬆嘅，好似突然多咗啲假期咁！」後來，公司改變政策，改為隔日在家工作，同事輪流返公司。「2月中起，大家都適應咗WFH，老細都搵到balance，真心要喺屋企做嘢啦！同一時間，囡囡學校都推出咗一系列『停課不停學』嘅計劃，真正嘅災難嚟喇！」
小朋友每天都要Home School，行程滿滿，功課多不勝數，上一週的功課還未完成，時間已默默地來到這一週。循環往復，功課累積如山，她看到都頭痛，更何況是8歲大的小朋友。「囡囡Home School，每日9-4準時上線，上足6-8堂Zoom直播，事前要準備好多工夫。佢要學咩，我要備定課；佢啲功課，我要幫手做。細路仔專注力唔夠，對住電腦根本聽唔入耳老師講咩，唔同平時上堂有互動，而家真係上完等於無上。我喺屋企嗰時，一陣要忙工作，一陣又要監視住佢認真上堂，一陣又要教佢做功課，忙到我暈。以為佢睇完老師直播會識做啲功課，點知全部白卷，問佢就一問三不知，最後乜都係要我由頭到尾教佢一次，咁就大半日，公司啲嘢都無時間做。」她除了要做好行政經理的工作，擔當好一個媽媽的角色，打理家頭細務，還要成為一個老師，教導孩子不同科目的知識。
▪ 在家工作意外刷新存在感？開視像會議、回覆電郵等5大禮儀見真章
「學校完全無安排online學習，我要自己研究課程安排，非常吃力，做到想發脾氣！」—— joey
背景：兩公婆都係IT人，她現時為中資銀行的programmer，仔仔7歲，今年讀小一。
Joyce兩公婆都能夠隔日在家工作，他們多數安排大家輪流在家照顧小朋友。因為學校沒有安排線上學習計劃，更沒有安排老師直播教學，只是安排了一系列的功課，所以Joyce直接充當老師，研究教程。「唔係間間學校都安排online學習，仔仔呢間就完全無啦，只係要求小朋友定期交功課，換句話講即係靠家長教學。一個星期有十幾樣功課，但只係重用返作業嘅內容，遲交又會係咁打嚟叫我哋盡快交。搞笑嘅係，仲要宣佈啲功課會計入總成績。心諗，我做晒佢算數，都係為做而做！」
她針對孩童發展自行擬定課程，專注閱讀和興趣的培養，有別於傳統課程的教學內容。「既然自己做，索性唔理學校啲功課，都係為做而做。自從開始WFH，我同仔仔相處時間多咗，先發現佢對科學及電腦程式好有興趣。所以我訂閱咗一啲外國嘅學習平台，有科學實驗嘅ScienceBOB、有語言學習嘅Rosetta Stone、有探索地球嘅Discovery Kids⋯⋯我同老公一人一日做老師，好吃力！但又無計，唔通睇住阿仔日日做功課做到傻？但係，在家工作真係要工作㗎，遇上趕Project嘅時候，又要教阿仔嘢，心底忍唔住想發脾氣。」
「兩兄弟互相騷擾，嘈到拆天，我根本做唔到嘢，仲要被上司單打。」 ——Sharon
背景：現時在裝品牌公司擔任marketing manager，大仔7歲，細仔5歲。
Sharon自農曆新年後，便一直在家工作，只需偶爾回公司，親友都大表羨慕，可惜她卻大聲感嘆：「救命！我其實好想返工。」原因就是兩個孩子在家日嘈夜嘈，工作進度不佳，她已連續多晚OT，仍趕不上原訂計劃，上司頗有微言。
「大仔嘅小學已經好好，安排好曬Google Classroom，但佢得7歲，點會專心睇實個mon？哈！哈！連我呢個大人，都無動力淨睇電腦做online reading啦！加上讀K3嘅細仔一齊喺屋企，幼稚園無安排咩課程，都係睇吓輕鬆影片，就會成日搵哥哥一齊玩。兩個人一陣老友鬼鬼，玩遊戲大叫大笑；隔一陣又吵架，甚至打架，喊到七彩，嘈到拆天。總之我就完全無心機做野，試過好多次開會時佢哋入鏡，全世界都大笑。覺得幾得意，輕鬆吓氣氛，但我上司暗地裡就好不滿，不時串我兩句：仔都湊唔好，點做好工作？」
▪ 【在家工作千日好？】Home Office助平衡工作與生活，為公司員工製造雙贏局面
▪ 疫情下home office上班，與返office所獲僱傭保障，有一定差別？
「小朋友好享受呢種教學方法，反而主動咗自己上網睇短片做功課，仲要求我一齊學！」 ——Yoyo
背景：現時在廣告公司擔任設計師，仔仔6歲，今年讀小一；囡囡5歲，讀K3。
意想不到吧？Yoyo的兩個小朋友都很喜歡現在在家學習的生活，坦言不想回到幼稚園上學，只想每天在家睇片學習，遇到問題就向媽媽查詢。「『查詢』係出自小朋友嘅原句，好笑呢！佢哋人細鬼大，哥哥主動做小老師教妹妹嘢。呢個詞就係佢地自學返嚟嘅。哥哥間小學嘅安排都幾好，功課量幾適中，佢仲會主動上網搵其他野學。我嘅唯一困難就係，佢查詢嘅問題我都唔識。嘻！嘻！例如空氣流動、太陽系行星⋯⋯ 佢突然問到，我即時口啞啞。」
以往在校上課，小朋友遇到問題，老師都能夠即時解答，但在家學習，自然是要問家長。Yoyo只好事先備課，盡量充份裝備自己，再發生口啞啞的局面。「唔學唔知，自己除咗設計，好多嘢都唔識，仲差過小朋友，唯有晚晚溫定書。雖然忙就忙咗，工作時間都少咗，但都係開心事！」
總結
小朋友在家學習，每人的投入度都不相同，每間學校的安排也不相同。媽媽在家工作，無可避免地成為了老師，以補足學習生涯的這段空白期。唯有安撫自己，雖然辛苦，但能親眼看著孩子，增加親子相處時間，也是一件好事。畢竟不是所有媽媽都能在家工作，還有很多人要每天返工，留下仔女在家學習，遙距離透過工人跟進學校交代的學習事務。內心呢，時時記掛家中的孩子，卻沒甚麼能夠做，只能希望疫情快些完結！
此文章由原作者及jobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及jobsDB保留採取法律行動的權利。
Increase your chances of getting hired. Create a jobsDB profile
Increase your chances of getting hired. Update your jobsDB profile
