地盤佬日誌—工程師的前途及錢途
工程師嘅起薪點係專業人士講算係好低，頭幾年人工都係好低。到考咗牌之後先有其他專業畢業嘅人工水平。
畢業的工程師
工程師現時畢業後嘅人工係專業人士講算係好低，只係多過一個普通文職人員少少，頭幾年如果唔行scheme A （工程師考牌用的在職三年培訓）都叫可以覺得自己有能力就可以跳槽去加下人工，但係簽咗scheme A的兄弟就多數只能夠按通脹加少少人工，維持低人工直到完scheme A （不過我都見過有人真係好唔鍾意間公司都係會爆scheme走人）。
我個人意見係頭幾年最主要係睇學唔學到嘢，人工差距唔需要太介意。因為一個差距唔會真係好大，但開頭嗰幾年CV同學嘢學得好唔好，對之後人工嘅影響可以好大。叻仔嘅，之後一兩個月都可以追番晒頭幾年嘅差距。同埋好多嘢頭幾年學唔好手勢就之後都好難會學得好。
考牌前後嘅工程師
先唔講啲唔考牌嘅兄弟（多數係做大判或者判頭又或者本身大學唔係工程師學會認可）。
我哋公司呢一行考牌考得快唔快對之後嘅前途有極大嘅影響，因為我哋呢行嘅經驗有分G+幾（畢業Graduate後幾多年） 同C+幾 （有牌Charter後幾多年）兩個都對人工有影響，所以有陣時一個四五年經驗但係考牌一take過，同一個10幾年經驗但係考咗好多次先考得到嘅工程師比，人工可以係差唔係好多。
另外一樣嘢好多人啱啱畢業頭幾年都係做顧問公司，目的就係為咗易啲考牌。不過顧問公司嘅人工普遍偏低，所以顧問公司通常考完牌之後就會好多人走。有啲會走去發展商，有啲會走去大判，再好彩啲就入到政府。
三、四十歲嘅工程師
去到三十幾歲工程師人工嘅差距開始大，可能大學同學裏面最高同最低嘅差距係倍數。
通常工程師嘅上升路線去到三四十歲嘅時候，多數人都知道自己個頂去到邊。有啲人都覺得自己唔想再升上去又搵到個適合自己嘅崗位，就唔會再去太過拼搏咁樣，多數就會將個重心放返家庭嗰邊；有啲實力比較強悍又有野心嘅，如果到咗四十歲都仲係好拼搏，通常都會一路搏到盡直到退休。
雖然工程師係專業人士來講唔算好高人工，同醫生律師嗰啲冇得比，不過際遇好的話，後期年薪百萬不是夢！
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
