入職簽約條款唔同咗點算？HR教路首日返新工5大注意事項

喺舊公司交接完畢後，就係時候踏入新公司啦！同新公司簽合約、Onboard當日，最怕人生路不熟，想知當日有咩要準備、份合約點釐清所屬公司、條款有冇伏位？以下由一班 HR 為大家做指路明燈啦！

1. 簽合約當日我有咩文件要帶？又有咩文件要簽及要留意？？

Miss M （金融機構HR）︰簽約當日要帶身份證、education certificate；同埋之前如果有 offer confirmation email 都可以印定，預先send咗比你嘅 form 都可以先自行填好。

A sir （資深IT Recruiter）︰個人身份證一定要帶。學歷證明及其他相關證書之類一般都要帶齊，其他嘢如果要帶，HR正常都會預先提醒（例如證件相／銀行帳戶文件或提款咭／手提電腦之類）。

2. 如果份新工係 Secondment 工作，我份合約係會由邊間公司負責？

T 小姐（本地大型企業HR）︰多數會由Agent公司負責，唔會係實際工作嘅公司負責。

R.D. （國際獵頭公司Recruiter）︰Secondment contract通常會由負責嘅agency公司準備。

▪ 【Fresh Grad搵工】6大新工簽約事項 注意隱藏細節防中伏

▪ 見工簽約前 勞工法例你要知！網民：面試公司有薪病假一年3日有冇犯法？

3. 簽合約嘅時候發現有條款同之前傾嘅唔一樣、或者有細則令我覺得奇怪，應該點做？

Miss M （金融機構HR）︰咁就要同公司 clarify 返，一定要問清楚先可以簽約。

R.D. （國際獵頭公司Recruiter）︰若果合約條款有出入或有疑問，喺簽署之前應該同相關公司或者agency反映及查詢，確定好細節先簽。

4. 返新工嘅第一日，我應該著咩衫？使唔使full suit ？

R 姐姐 （公營機構HR）︰可以留意番公司安排你第一日返工嘅服裝要求。如果冇特別要求，都唔一定要full suit，着得乾淨整齊就得啦！或者smart casual就最穩陣。

A sir （資深IT Recruiter）︰Interview完嘅時候可以問下公司culture、同事多數會着咩，會唔會有Casual Friday之類；或者收到Offer嘅時候問亦都得。假如唔記得問，穩陣起見可以著full suit，再喺第一日觀察其他同事衣著。

▪ 同事以上，朋友未滿！職場人際忌與宜：3大技巧拿捏適當距離

▪ 改錯名影響職場人際晉升？同事半年改3次名 呢啲英文名要避免！

5. 第一日嘅Lunch Time 應該點樣安排？應該留畀上司、同事定係我主動去邀約？

T 小姐（本地大型企業HR）︰通常上司會安排；但係如果佢哋冇，都可以自己主動約下。

R 姐姐 （公營機構HR）︰第一日嘅lunch多數唔好有特別嘅安排（例如帶飯、約其他朋友），可以等上司或者其他同事邀請你食welcome lunch。新同事第一日入職，其他同事多數都會約你食飯嘅！最後如果冇welcome lunch，咁咪自己再安排，當係第一日熱身，了解吓大家嘅lunch time文化呀嘛！

預備好晒新工 On Board 手續？咁就加油努力喺第一日表現最好嘅自己啦！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。