地盤佬日誌- 地盤佬點搵工
要有工返之前就要搵工，搵到工先有工開㗎嘛！
地盤師傅點搵工？
如果係職業訓練局課程出嚟嘅，多數第一份工都係職業訓練局安排嘅。其他白紙（無經驗的）就多數係有親戚朋友介紹先入行。
雖然依家多咗人喺網上群組搵工，某啲好啲嘅網上群組嘅群主同管理員會幫手過濾。不過網上群組啲判頭蛇頭質素比較參差，如果出現有汗出無糧出，要搵返個蛇頭都幾難。
最多人用嘅嘅方法都係搵人介紹，搵親戚介紹、兄弟介紹、舊老細介紹、其他行家介紹等⋯⋯搵人介紹有幾個好處：第一，如果嗰個人真係當你係兄弟，正常就唔會介紹啲太衰嘅老闆比你；第二，如果俾人拖糧出嗰陣時，都可以搵多個人幫你。不過都有唔好處，例如：你要爭人人情（總有一日要還）、有其他筍工要走嗰陣，又要考慮會唔會影響介紹你嗰個人⋯⋯
地盤管理層點搵工
依家啲後生仔啱啱入行最多都係用網站搵工，最多人用當然係Jobsdb，我當年搵工都通常係用Jobsdb。不過到咗中層，開始喺行來多啲人識，怕俾人見到，就會開始減少用網站搵工。而家有好多大公司都有介紹人入公司嘅獎勵計劃（獎金通常係幾千到幾萬，高級越高獎金），再高級啲就通常用獵頭公司。
轉工多好唔好？
地盤班師傅多數都轉工當食生菜咁，因為行業上就係要咁樣。
管理層的話我都建議可以喺後生嗰陣時轉多幾次工，搵到邊間適合自己嘅就做耐啲，唔適合嘅第一兩年又再轉工。但係人到中年開始就要減少轉工，因為每次轉工都要夾過晒啲人，人夾人呢樣嘢就算你個叻都唔一定夾到。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
