出名階級森嚴、謹慎敬業的日本職場近年興起一陣「閱讀空氣」的風氣，意即學識察言辨色、睇清局面及尊重他人，這套放諸香港職場亦十分有用。不論你是初出茅蘆的新人，還是在職場打滾多年、眉精眼企的資深小薯，職場上很多你來我往的不經意言詞或另含一層深意，打工仔要識解讀兼識解話，從而令自己在職場上無往而不利，有心上位者可以佔盡先機，低調安份者亦可以避過人事糾紛。以下一些新人及資深員工常面對的熟口熟面台詞，建議這樣應對。
職場新人常聽5大台詞 小心應對老細同前輩
1.「有咩唔明可以問我。」
潛台詞：通常講這句話的人有兩類人，一是想擺款的公司old seafood，二是負責指導你的前輩或上司。前者說這句或者只是基於想讓你知道他在公司有一定的年資或地位，後者則大多是盡責的交待一聲。無論說者是誰，作為新人的你一定要緊記，尊重及善意的回應可以助你在這些前輩心目中留下好印象。
積極版答法：「好呀，我會先睇晒呢啲資料同了解吓個system先，如果有咩唔明一定會問你。」這樣的說辭顯示你會先自行嘗試，如有需要才向對方請教，而非每事問。
低調版答法：「好呀，我暫時未熟公司嘅運作，有咩不明，要麻煩你嘞。」表現出較謙虛的一面。
2.「以後可以一齊食lunch。」
潛台詞： 同team同事邀約你一起食lunch其實是一個好迹象，顯示對方釋出善意，當然這亦可能是他的客套話，無必要過份解讀對方的邀約，平常心看待即可。
積極版答法：「當然好啦，我都好想同大家多啲食lunch，我仲未熟路，要靠你哋啦﹗」顯示積極參與的意願。
低調版答法：「好呀，以後大家食lunch叫埋我吖。」不失禮貌的答法，點到即止。
同事邀請lunch飯局，無論是客套還是真心，都要應對得體。（圖片：Unsplash)
▪ 邊個小動作代表唔想同你講落去？職場讀心術秒懂同事上司心理
▪ 瞬間暴露性格！5句網民最憎口頭禪 影響職場人際關係及工作表現
3.「呢單嘢唔急㗎，可以聽日先搞。」
潛台詞：正所謂「唔急，最緊要快」，職場新人的確較難推搪工作，如果有前輩甚至是上司作出這樣的要求，不要覺得自己被「使到盡」，不妨視之為磨練自己的任務。
積極版答法：「我忙完手上嘅工作就會開始做，希望可以盡快俾到你。係呢，你幾時要？」強調自己會儘快處理，並向對方詢問死線，如果你覺得自己未必能依時完成，最好主動爭取多點時間。
低調版答法：「可以呀，我做埋手上嘅嘢就會搞。」不需要明確承諾自己會幾時完成，如果對方真的很急，他會主動告知死線。
4.「你同佢好似好friend⋯⋯」
潛台詞：職場是一個人事深海，稍一不慎都有可能落入是非圈子，通常無端百事打探別人關係者，都極有可能是是非精，你要做的是不要跟他有深入接觸，回答時不要摻雜個人觀感。
積極版答法：「我哋最近有個project一齊做，所以多咗好多交流，我都希望大家可以多啲合作，可以學到好多嘢。」職場新人宜避免向其他同事稱「我同邊個好friend」，因會予人有埋堆入小圈子之感，同時傳到對方耳中，萬一對方並沒有與你稱友的想法，就會心有芥蒂。最好的做法是強調自己與對方在工作上有正面的交流，在工作間保持專業的形象。
低調版答法：「我仲係新人，都係認識緊啲同事，希望同大家相處愉快。」避免談論對方提及的同事，避重就輕，帶出團隊氣氛最重要。
5.「做錯唔緊要⋯⋯」
潛台詞：在工作上出錯，上司或會對你說出這句，然後引申至你的工作表現，如果你表現出極為保護自己，只顧自辯，上司會認為你沒有反省能力，下次再有類似情況發生，對你的負面想法就會加深。
積極版答法：「對唔住，喺呢件事上面都係因為我冇向銷售部門確認而出咗錯漏，要其他同事幫我執漏我真係好唔好意思，我知係其他team-mate幫忙先解決咗呢件事，我會向佢哋道謝，同埋打返俾個客向佢交待道歉，我一定會吸取今次嘅經驗，下次會確認咗先出單。」要直面承認自己在哪部份犯了錯，不要含糊其辭，同時如果有其他同事出手相助，亦要答謝對方，並提出一些補救措施顯示你對解決問題的誠意。
低調版答法：「對唔住，喺呢件事上面因為我嘅疏忽令同team同事都受到牽連，我會跟進返呢位客戶嘅單，同埋處理返啲手尾。如果有咩我可以做得再好啲，希望你可以俾啲advice。」保持負責任形象，向上司表示願意承擔責任，同時如上司有任何建議，要虛心接納。
資深員工最易遇到的5大問題 如何KO卸責及加「辛」潛台詞？
1.「咁早走嘅？」
潛台詞：說這句話的，可能是隔離位同事，或你的上司。如果是前者，可能只是說者無心，建議禮貌道別即可。如果是後者，就要琢磨一下如何回答。
積極版答法：「係呀，約咗人食飯，今日晏晝開turbo做晒手頭上啲嘢。聽日再努力過啦﹗」雖然準時收工並無不妥，不過如果上司是個工作狂，你可以適當地表現出自己着緊工作的一面。
低調版答法：「係呀，聽日見吖，拜拜。」這個答法其實沒有問題，如想準時收工又不想找原因/借口，最好當然是禮貌道別，不用多作解釋了。而且作為資深員工，你對公司及同事應該有一定的了解，拿捏好尺寸、不得罪上司應難不到你。
香港打工仔慣常開OT，「咁早走嘅」已成老細口頭禪。（圖片：Unsplash)
▪ 調校你Manner！事業多靠人際關係 職場新鮮人難控制情緒、多口點算好？
2.「你忙唔忙呀？」
潛台詞：如果出自隊友把口，可能只是要求你幫一些小忙，那就不用太警覺；如上司這樣問，多數是想給你添加工作量，直接答我好忙會令他覺得你「落晒閘」，沒有商量餘地。
積極版台詞：「我整緊份季度分析表，禮拜五之前要交，係咪有咩需要我involve？」這句既是帶出你現有的工作量尚未完成，但留有一絲空間讓上司有話可說。即使最終你未能幫他完成急件，也要讓他覺得你份人有商有量。
低調版台詞：「我整緊個季度分析表，係咪有咩急事？」只要帶出自己目前有工作在身，不需交代太多細節，如上司真的有事要你幫忙自然會說。
3.「我知你放緊假，不過⋯⋯」
潛台詞：職場上其中一條定律，叫做「放假先嚟搵我」，作為有一定年資的打工仔對這台戲都不會感到陌生。如何應對？冷靜啲先⋯⋯
積極版答法：「我呢幾日去咗酒店staycation冇電腦喺身，係咪有咩急事？如果係，可以搵咗Tammy先，因為我手頭上嘅嘢佢跟緊。」強調自己沒有電腦跟身，不方便處理公事及提醒對方自己在度假。
低調版答法：「我冇電腦喺身，如果有咩急事，建議你搵Tammy，佢應該幫到你。」善意為對方提供可求助的對象。
4.「你點睇/你覺得呢？」
潛台詞：這句通常出現在上司不想同意團隊的某些想法/意見，而他亦沒有其他實在的建議，所以純粹希望尋求附和。當下你要做的不是滔滔不絕說出你精闢獨到的見解，要兼顧團隊氛圍，不要讓隊員覺得你在討好上司，有擦鞋之嫌。
積極版答法：「我覺得大家嘅idea原意好好，亦都好合符品牌形象，只係需要喺細節上再調整，同埋執行上可能有啲阻力，或者可以再傾吓點樣完善返成個構思。」打圓場是最好的做法，讓團隊及上司都有緩衝時間再思考。
低調版答法：「暫時呢個只係初步嘅idea，我覺得可以一步步去調整，我都仲要思考吓有咩改進嘅地方。」爭取時間再想想，然後建議大家再提出改善方案。
5.「我講嘅咩？我冇印象嘅？」
潛台詞：聽完這句話，打工仔都會深深不忿老細又在「打倒昨日的我」，無論老細真的是貴人善忘，還是有心否認自己的說辭，打工仔都不宜正面挑機。
積極版答法：「之前同銷售部Steve條team開會嘅時候，大家都同意你講嘅方案係最適合嘅，不過而家情況有變，可能就未必再適用。」提及有第三者曾在場見證，然後以團隊的角度去打圓場。
低調版答法：「之前開會時有講過，大家都同意咗個方案，而家情況有變，可能要搵其他方法。」不必拉同事落水，以團隊包裝圓場。
工作佔去打工仔大部份時間，大家都不想職場上要爾虞我詐去做人，上述提供的種種修飾說法，只是希望再次提醒大家在工作間互動，對上司、同事要多一分尊重及善意，不必要的衝突可免則免，展現自己的真正軟實力。
此文章由原作者及JobsDB HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及JobsDB保留採取法律行動的權利。
