地盤佬日誌－做工程嘅未來？

我十幾年前入行個時已經有人話工程玩多幾年做完十大基建就玩完加啦做工程無未來。近年就有人話外勞、MIC預制件同AI機械化生產等等工程用人只會越來越少。不過未來發展預測好多時事後都証明係錯嘅。

AI機械化生產

對落手落腳嘅師傅嘅影響暫時都比較細，例如有人要整一部紮鐵機械人嘅成本可能都夠請個扎鐵佬10年嘅人工。正常就冇乜老細會投資落去。之前地盤都用過批蕩機械人（其實只係將啲泥水就咁推上牆度）做出嚟嘅空鼓率俾人做多咗好多，只可以話有啲嘢真係要用陰力先至會做得好。暫時喺成本嚟講自動機械人短期內應該取代唔到人。

外勞問題

增加外勞中長期嚟講係會令到工人嘅人工會逐漸漸趨緊鄰近地區嘅人工，呢樣嘢對香港工人嚟講係有負面影響嘅。不過呢個問題解決方法就要睇吓政府嘅取態，如果請完外勞之後，城市嘅失業率大量加大，正常嘅政府就會停止或減少外勞。

MIC

Modular Integrated Construction，MiC 「組裝合成」建築法是透過「先裝後嵌」的概念，「組裝合成」將現場建築工序轉移至較易控制的廠房進行，在廠房中製造獨立的「組裝合成」組件（包括裝飾工程、固定裝置和屋宇設施），樓宇在組件送達工地前已大致上完成。咁樣做係會減少現場工人嘅數量。不過主要都只係可以用喺標準層，一啲比較複雜多變或下面裙樓同地庫都好難做到MIC。

我自己覺得而家香港建築業工人人數上面已經見頂，前景係有少少四面楚歌，未來幾年工人人數只會減少。自己可以做到嘅嘢只係好好裝備自己，唔好令自己係行業裏面最差嘅人，唔好有咩事第一個淘汰就係你。生於憂患 死於安樂。

▪ 地盤佬日誌-打風

▪ 地盤佬日誌-點樣吸引年青人入建築業？