地盤佬日誌-點樣吸引年青人入建築業?

地盤佬日誌-點樣吸引年青人入建築業?
Jobsdb content teamupdated on 22 August, 2023
Share

近年越來越少年青人入建築行業,開始青黃不接,畀到藉口政府引入外勞。係時候要反思吓點樣改善地盤工作,吸引多啲年青人入建築業。 

▪ 地盤佬日誌- 地盤佬點搵工

▪ 地盤佬日誌-引入外勞好唔好?

Lv1 改善錢 

返工最重要最重要嘅從來都係「錢」,不過就算近年建築業人工不斷改善,但係年青人入建築業都係一年比一年少。問題出喺邊?問題有好多方面,首先都係錢嘅問題,管理人員入行時嘅人工喺專業人士裏面算係低,加上行內無薪OT太多。師傅方面就因為太多有汗出無糧出,現時有部份業主同大判實行「入閘必有糧出」,如果可以全港全面落實「入閘必有糧出」都已經比依家吸引好多,如果可以改善到收入穩定性,增加月薪制師傅人數都可以吸引人入行。 

Lv2 改善環境 

見過有人第一日返地盤,本來滿腔熱誠,但係一開個藍色臨時廁所門,就驚嚇到走咗,去個日人工都唔要。又有個機電工程師仔話一定唔跟供排水,因為做供排水啲低位多數都滿晒屎屎尿尿。 

其實唔一定要好似日本嗰啲地盤咁,做到一塵不染。但係最小要做到大家都可以有尊嚴同安全咁返工。大判加多幾個清潔姐姐日日去洗臨時廁所,加上做好管理,加上重罰令啲師傅個個都入返廁所,地盤環境就已經好好多。 

地盤安全就真係要全地盤一齊努力改善,「地盤零意外」唔係得個講字,係真係要大家都有安全意識。 

只要令大家覺得自己返工係一個人唔係一隻狗就已經好好多。 

▪ 地盤佬日誌- 高人工傳說

▪ 地盤佬日誌—給新入行地盤佬的小建議

Lv3改善社會地位 

西方社會藍領同白領人士社會地位相差唔大,不過我地華人社會都係萬般皆下品惟有讀書高,做建築業人工基本上都唔比一般文職人員差,但文職人員只要公司唔太差慢慢都請到人。 

如果話返工要體力勞力,消防員都不比地盤佬少,但係消防員係唔少小朋友嘅夢想職業;相反,夢想職業係地盤佬嘅朋友可能小於0.1%。 

要見血玩屎玩尿的話,醫生護士都一樣要,但係醫生護士就大把人仆住入。 

除咗錢同環境之外社會地位都係吸引年青人入建築業係一大誘因,不過錢同環境都係地盤自身問題,有價有期係可以自己改善,但係改善社會地位就真係要全行一齊努力同社會有所發展。 

 

港夫.李澳

香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。 

檢視此作者的所有文章

 

此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。

More from this category: Industry stories

Top search terms

Want to know what people are searching for on Jobsdb? Explore our top search terms to stay across industry trends.

Subscribe to Career Advice

Get expert career advice delivered to your inbox.
By providing your personal information, you agree to the Collection Notice and Privacy Policy. You can unsubscribe at any time.