地盤佬日誌-打風
香港好多一般打工仔都好希望打8號風球，不過遇上打風，做地盤其實一啲都唔好受。等我亂噏一吓。
師傅方面
打風前幾日，多數因為低氣壓，令到日日都萬里無雲又熱到爆炸，日日都係中暑高危日。到真係打風嗰日，因為多數師傅都係日薪工，所以打風都係手停口停無人工。打風之後，雖然有話「打風唔成三日雨」不過其實「打得成」都一樣三日雨。地盤無永久排水系統，個啲500年一遇嘅大洪水，永久排水系統都頂唔順，地盤啲臨時排水系統點會頂得順，所以多數情況係洪水一到地盤變水塘，架步一浸就好多時電架生都浸壞。落雨開工又不停由內濕到外再由外濕到內，底褲濕就習慣曬，鞋襪濕到可以倒得出水就真係唔舒服。
地盤管理層方面
雖然地盤管理層正常都係月薪工，唔會手停口停。不過打風都會多咗唔少嘢做，所以都唔一定鐘意打風。打風之前附加工作量都有唔少包括竹棚檢查、大型機械加固、排水檢查、總公司大檢查等等。打風果時，我就多多少少都有啲心理壓力，怕天秤、竹棚等等可能出事。之前試過水浸架步，工作用嘅電腦浸死咗，好多記錄同做到一半嘅嘢都冇咗，之後煩咗幾個月。另外，打風之後附加工作量都有唔少包括竹棚修理及出棚紙、大型機械再驗機、有事要報保險、有啲要eot (Extension of Time) 預報、無eot 就要改進度計劃加壓之後工期。
打風係天災，可以的話都係希望可以少啲發生。地盤要做嘅嘢係做好自己，減少對社會造成危險嘅人禍機會。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
