每一個喺做過地盤嘅人,都會接觸過不同類型嘅判頭,當然有好有壞,大致上可以分為五種類型:
有一種判頭,佢哋嘅生存之道純粹係「買人頭」。基本上,呢種判頭嘅優勢就係識人多。當有人要人嘅時候,佢就可以介紹佢自己啲人俾佢。例如有人要50個扎鐵佬,佢就可能介紹咗20個俾佢,之後每人每日抽$100佣金。蛇頭可以話係一個無本生利的行業,最重要是人脈好。
地盤裏面,有另外一種判頭係成間公司可能得佢一個人(或者請多一兩個),但係唔知點解,佢哋會有幾千萬甚至乎係幾億嘅生意。或者你會好奇:「點解人哋要幾百人先做到嘅生意額,佢一兩個人就做到呢?」原因其實好簡單啫——因為佢根本冇做過!通常佢哋係一接咗單,之後就成單打包(自己食咗幾個%錢)再判比人。通常佢哋嘅老細把口都好叻,加上有豐富嘅人際網絡,同唔少大公司高層相熟,所以都有啲長期客仔搵佢地。
可能其實所有生意佬都係咁樣,一係就太財大氣粗,一係就太庹縮。
先講財大氣粗嗰班,佢地好多時都睇落好暴發戶,袋裏面夾着十萬八萬現金,揸住架大寶馬或者大波子去送材料,同佢地相處嘅話,就同普通地盤佬差唔多。
庹縮型,每個行業都一定有庹縮老細,因為佢咩都唔想比錢,所以多數人工都唔會高,做佢手下亦都幾慘。不過正因為佢壓低咗成本,令到個標價亦都相應地低,所以生意多數都長做長有。
好多判頭一開始都唔係做判頭,有啲一開始係做師傅(工人),有啲係打理人。學滿師之後,佢地想發大嚟做,之後就膽粗粗自己開間公司做老細。做咗判頭之後,佢哋繼續學習同埋累積經驗,慢慢就成為嗰個行業裏面嘅專家。不過可惜嘅係,呢類型嘅老細比較少。
雖然好多判頭公司都係賺到錢嘅,但係如果有一日想唔做,要賣公司都幾困難,因為價錢都從來唔會好。所以好多時,大老闆做到老之後,都盡量會想搵自己嘅仔女去繼承。不過現實係,可能做生意真係要睇天份啦!絕大多數啲仔女都做得冇老竇咁好。
港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。