地盤佬日誌-搵食啫，點先可以上位？

喺得一個行業搵食，雖然一入行嗰陣時就會喺食物鏈嘅最低端，但係斷估冇人想一路都係低位躺平向上爬吧。多多少少都要爬一兩級啦！

等我有講吓我見到呢行嘅人點樣向上爬啦。

能力

打鐵還需自身硬，想要上位基礎能力點都唔可以太差（就算擦鞋仔嘅擦鞋能力都唔會太差），所以要上位，首先都要增強自己能力。增強能力有分地圖炮定係專攻某一樣嘢。有啲人學習能力好強亦都諗住上到啲好高嘅位例如目標係啲大PM，就最好樣樣都要識啲。但係如果真係能力普通嘅，就最好搵某啲嘢嚟專攻某啲能力，向某一個專業化發展。再唔係其實可能淨係發展溝通能力都已經可能有機會可以上到位。路有好多條，不過都要揀條自己啱嘅路。

攞專業證

不論係坐寫字樓嘅助理工程師仔，定係前線啱啱入學嘅白紙師傅仔。正路嚟講都要喺入行頭嗰幾年諗定自己要考啲咩專業資格，如果唔係個發展會比同輩嘅人差好多，或者去到某個位就係樽頸位一路都過唔到。仲要專業證係越早攞越有着數。可以令到你快速升到上比較唔錯嘅位。

轉工 / 轉行

要上位，另外一個途徑就係轉工或者轉行，首先如果發覺自己唔啱嗰間公司或者嗰個行業就盡快要轉。有陣時有啲公司好好做，但係上面啲高層嗰個都坐定定等退休，但係有排都退唔到休嘅話。如果諗住上位都可能要離開呢啲公司，因為真係冇位上。

▪ 轉工前停一停諗一諗？局面好壞參半未必要辭職 4條核心問題決定去留

▪ 地盤佬日誌-地盤文職好好做？

除咗有啲人一畢業就諗住做鹹魚（例如我）一世都唔想上位嘅之外，正常係三四十歲之前都要計劃下點樣上位。如果唔係真係搵唔到食。

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。