地盤佬日誌-考牌
好多人都覺得地盤佬係無學識無文化得牛力。不過其實依家做一個高級地盤佬要考嘅試可能多過好多文職嘅人。
入行先要有三寶（初級）
入地盤先要有身份證（引入外勞後可能唔使），平安卡同工人註冊證
其中平安卡係要上堂同考筆試嘅，筆試雖然只係選擇題，因為本身呢個卡嘅原意係比工人入行前對地盤安全有一定嘅基本概念，所以其實題目對於有中學以上學歷嘅人來講，就唔算有咩困難，只要正常睇過佢本書仔正常都會合格，不過都聽過有啲人連續考幾次都唔合格，最後入唔到行。
中工（中級）
雖然好多師傅都覺得中工牌有同冇對佢哋嚟講都差唔多，不過根據官方要求要考中工之前要先有兩年地盤經驗或者讀完相關認可課程，之後先有資格去考，呢個考試係要考筆試，同埋實務試。筆試雖然都只係10條選擇題，但係包含嘅嘢都好多由行業法例到大樣圖都有機會考到。另外實務試就真係考師傅嘅手工，不過始終考試都係有啲技巧嘅，例如做完之後要清理呢啲嘢，如果唔知道俾人無謂扣分就有啲戇居。
大工（高級）
對於大部份做咗好多年嘅大師傅嚟講，考大工最難嘅嘢唔係技術，而係你要有一個有好嘅老闆肯幫你簽工作經驗，因為呢樣嘢本身就同老闆嘅利益相反，啲老闆覺得考完牌師傅手工同唔會有咩分別，但係之後又要加佢人工，同埋因為我哋行業來講好多時啲師傅都唔會係同一間公司度做幾年，多數都係可能做幾個月就要轉一個地盤轉一個老細。所以好多老細都唔願簽工作證明俾啲師傅。
其他牌（特殊技能）
另外有好多要用唔同嘅特別嘢就要有特別嘅牌，例如要入密閉空間做嘢就要有密閉空間牌，用風煤要有風煤牌，開剷車要有鏟車牌，叫天秤要有訊號員牌等等。
如果真係要攞捉晒地盤裏面嘅牌，真係一個銀包裝唔晒。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
檢視此作者的所有文章
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
