地盤佬日誌 - 起貨收錢
做工程最終嘅目的從來都係起貨收錢（雖然通常尾數都要等好耐），起貨都有分判頭起貨，同埋全個項目起貨。
判頭起貨
判頭起貨都有分「做完就可以拍拍囉柚走」，定係「做完要執手尾」嘅分別。做完可以拍下囉柚就走嘅最典型有紥鐵佬、打樁佬，同埋某啲分得好細嘅三四沙。以紥鐵佬為例，落完石屎之後，基本上除咗拆晒佢之外，你都唔會搵到有啲咩方法去改你嘅鋼筋，所以根本冇乜機會執修。但係之後其他大部份嘅判頭做完一次之後都多多少少有啲嘢執修，釘板佬如果石屎由大肚要幫手打，泥水佬如果有大空鼓又要拆過重做，防水佬如果係保固期裏面嘅漏水就又要幫手執。
成幢樓起貨
成幢樓起貨有分「政府驗收」同埋「最終業主驗收」
政府驗收通常我哋會分兩個階段：
第一個階段係驗消防。驗消防，通常係地盤最緊張嘅其中一個節點，因為驗消防會係第一個大型驗收。通常驗得消防，基本上所有嘅走火通道樓梯電梯風火水電工要基本完成有足夠嘅功能性。所以通常驗消防之前嗰一個月大家都已經要趕頭趕命。
第二個階段就係OP入伙紙又稱為佔用許可證（Occupation Permit，簡稱OP）政府會喺地盤完工時地盤入紙申請，政府會派員檢驗，以了解單位是否符合結構安全、入住標準、物業的用途及每層單位數目等等有冇按圖施工。因為之前驗消防嗰陣時大部份嘅功能性已經齊全，所以一般情況下只要是依據建築圖則施工完成晒圖上面嘅嘢通過基本上唔算難。
如果係私人項目完咗政府驗收之後通常合約都有啲裝飾嘢係之後做，通常好多室內設計圖裏面嘅雕龍雕鳳裝飾品都會喺呢段時間做埋，同埋有啲之前業主唔滿意嘅野會喺呢段時間重做之後先至正式交貨。
起貨就可以收錢？
雖然大家都想起貨就馬上有錢收，不過可惜事實並唔係咁。通常工程合約上面都會寫咗起貨收貨之後有一個保固期，例如好多時係寫兩年，有啲防漏水等等可能會寫五年甚至乎更長。另外，通常合約會寫明一個總金額percent，例如係10%或20% (以前會叫支九留一)，就要等到過期執好晒之後先至會俾呢個尾數。不過有時就算完咗保固期都唔一定係即刻攞到錢，仲要你嘅QS(工料測量師)同埋對方嘅QS 對好晒條數，大家都同意嘅話先至可以收到尾數。
