地盤佬日誌-地盤佬唔使交稅？
有好多人嘅刻板印象就係覺得地盤佬、三行佬、的士佬都係唔使點交稅，其他行業我唔知啦，但係地盤佬而家多數都係有交稅嘅。
邊啲地盤佬會交足稅？
基本上同大公司打工因為間公司（業主顧問公司大判等等）都會幫你正確報稅，所以基本上都會交足稅。例如我自己兩公婆我交嘅稅差唔多係我老婆嘅十倍（不過因為稅係累進，人工唔係10倍） 。
邊啲地盤佬會交唔足稅？
陰陽合同
娛樂圈有陰陽合同，傳說中工程界都有，有啲判頭請人嗰陣時會要求分大糧細糧，就係例如大糧＄1500一工、細糧＄500一工，合約就淨係寫大糧通常係月頭出糧係會正常報稅，細糧就可能係月中出或者現金出。
先講講咁樣對判頭有咩着數，首先就係佢法定月頭7號前只需先比大糧，其他嗰啲就可以扎住數先。另外就係如果真係冇錢出糧嗰陣時，如果啲師傅走晒出去街拉橫額（有汗出冇糧出），有啲大判係會代判頭出糧之後再扣判頭錢。但係咁樣做就只係會出到大糧。
咁樣對師傅有咩好處？對某啲爛賭鬼或者洗腳唔抹腳嘅師傅分開兩次出糧對佢哋來講係好啲嘅，另外咁樣分開出糧MPF可以交少啲交稅都可以交小啲。不過如果有得揀我都唔建議師傅揀呢個大細糧組合，有咩事個盤頭走路又喊都無謂，不過我都知好多時候係冇得揀嘅。
判頭
因為判頭其實都係有限公司，交稅基本上就係盈利減去支出，其中支出好多嘢都可以納入去，所以有時有啲搵好多錢嘅判頭都可以合法地避稅到要交稅嘅金額可能比一個普通打工仔小。
其實而家大部份地盤佬都唔係現金出糧，交稅係無可避免。
港夫．李澳
香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
