地盤佬日誌：「地盤佬食啲咩？」

如果我依家問你地盤佬鐘意食啲咩？我估好多人都會估地盤佬咁man一定鐘意食男人的浪漫—豆腐火腩飯，不過查實地盤佬最愛永遠都唔係佢。

地盤佬一日食幾多餐？

正常人一日係食三餐(早午晚)，不過有啲地盤佬就可以一日食六餐(早7點、早10點、午餐、三點三下午茶、晚餐、宵夜)。地盤佬返工係好辛苦架，尤其是係釘板扎鐵落石屎佬，所以有時有少數好嘅分判老闆，會每朝十點同下晝三點三就會吊啲嘢食、嘢飲比啲工人（不過唔係個個老闆會咁做）。

十點餐同三點三下午茶你唔好以為食得好好，其實通常佢哋好啲就係一杯奶茶咖啡加個包、差啲就係清水加個齋包（有啲係老細請有啲係自己揞荷包買），食啲兩餐多數唔係為享受而係體力消耗太多需要補充體力（做紮鐵唔食呢兩餐真係可能會暈㗎！)

啲下午茶點樣運上去呢？多數都係同啲材料一齊用天秤吊上去，所以多數要請埋個天秤手食(如果唔係下次佢就唔幫你吊)，亦都係因為呢個運輸方法所以多數啲包都要無汁無醬，如果唔係吊到上去就成Pat屎咁睇到都唔想食。

▪地盤佬日誌：地盤術語

▪地盤佬日誌：地盤佬等於身體好？

咁地盤佬最鐘意食啲咩？

根據非正式統計係蒸魚飯，好似唔少地盤佬尤其是係老一輩嗰啲都係特別鍾意食蒸魚飯。每次喺地盤附近嘅茶記最多地盤佬入去食嗰間就好多時都有蒸魚，就算佢離開個地盤比較遠都係佢最多地盤佬。點解鍾意蒸魚？

1. 係全城茶餐廳可以叫到嘅餸裏面係最健康﹔
2. 因為要等，快餐三個字食完就開工，淨係倫骨都去左三個字﹔
3. 水缺很大的職業，食肉多每次上廁所次數就會多﹔
4. 礦物質多，身體自然會因需求調節食慾﹔
5. 老行規地盤佬唔食魚，會睇見和尚師姑或女人梳頭唔返工（聽老師傅講過，我都唔知點解）。

山旮旯地盤可以食啲咩？

其實有唔少地盤位置都非常偏僻，方圓10里都冇嘢食，咁嗰啲地盤嘅地盤佬食啲咩？多數呢啲地盤都會有van仔飯車賣飯，多數啲飯都比一般茶餐廳平，味道就睇你好唔好運，不過衛生就好一般了。烏蠅曱甴係飯裏面就好常見，全隻老鼠都見過。傳說一個地盤van仔飯搵嘅錢多過一個大經理，不過你自己想搞番檔就無咩可能了，除非你係有背景人士。

多數地盤佬有工開就會食得比較豪氣，辛苦得來志在食(食得比一般白領豪），不過無咩工開就會食得簡單啲（手停口停)。

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

檢視此作者的所有文章

延伸閱讀：

地盤佬日誌：大隻佬做地盤有着數？

［職場故事］我為何選擇「紮鐵」這條路

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。