個個都做地盤佬,你估個個都想做地盤佬咩。我估無人細個時寫「我的志願」會寫「大個要做一個扎鐵佬」,做得地盤,其實都係為咗生存而向現實低頭嘅一種選擇。
以前做得地盤佬一般都無咩文化,但係而家新一代嘅香港人,通常最少都高中畢業,文職人工又不斷貶值;相反,藍領工比較辛苦,無乜後生仔入行,因為缺人而令人工水漲船高,於是令部份比較高學歷的藍領出現,藍白領嘅學歷水平越來越接近,不時會有大專甚至大學學歷嘅建築工人出現。
近年報紙不時有報導,話釘板扎鐵落石屎$2,xxx一日人工超高,令到好多人覺得個個地盤佬都好高人工。的而且確,地盤工人嘅工資係比其他行業高啲,不過唔係大家想像中咁多。以地盤嘅主要工人嚟講,結構三寶(釘板扎鐵落石屎)嘅人工可以話係地盤之冠,當然辛苦程度都係全行之冠。至於其他裝修機電佬,多數人工都仲係$1,xxx一日。
另外,多數地盤佬都係無任何福利可言,因為地盤有好多師傅都係日薪工人或炒家(炒家就係判頭再分判到工人嘅方式,例如某判頭將一樓層分為10區畀10個炒家,要佢3日起貨,我唔理你一個定10個做都係咁多錢,簡單啲講就係自僱人士),MPF、醫保、年假、病假等等咩都無。
眾所周知,地盤係重體力行業,好多新人一入行幾日就頂唔順話唔做。雖然多數人都係頂唔順長時間嘅高強度體力勞動,但有時就算有啲大隻仔入嚟,都一樣幾日就頂唔順,點解呢?因為地盤嘅環境比好多人想像中更加惡劣,要俾人鬧到毫無尊嚴,想搵個廁所難過登天,每個地方都污糟邋遢,又要做人肉吸塵機,危機四伏,真係有心理準備頂得順你至好嚟。
我估都無乜人咁偉大會以建設社會做入行理由,其實大家之所以會前仆後繼咁走入呢個危險丶辛苦嘅行業,都係為咗喺香港呢個咩都要錢嘅超級現實社會,想有多少少嘅人工,令家人嘅生活過得好一啲。
港夫‧李奧
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。 |
此文章由原作者及Jobsdb HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及Jobsdb保留採取法律行動的權利。