地盤佬日誌—為咗工程你可以去到幾盡？

雖然好多人做工程都係得過且過，亦都應該冇乜人嘅夢想係做工程。不過都有啲人為咗工程，都可以去到好盡。

將青春奉獻給工程

工程師—好多人由踏入大學工程系嗰日開始，就已經開始後悔。因為佢哋發覺原來工程系比好多其他嘅學系係辛苦好多嘅，特別係當其他商業管理學系嘅同學俾好多女仔圍住嗰陣時，工程系嘅學生只能夠一大班佬喺度圍住諗緊點計數。當出到嚟做嘢，如果係成為設計顧問，就會發覺每次入則都係一個惡夢，每次都係挑戰人體極限嘅OT。我自己當年都試過連續一個禮拜翻8:00至25:00（半夜一點）之後，最後一日仲要通頂。

瘋狂級數嘅工作日數

成個工程行業除咗上家（政府業主顧問）之外，基本上大部份人都係一星期返六日，好多時趕起上嚟，一個月返足30日都有（不過都會有時成個月都冇工返），有啲兄弟直頭係一年返足36X日，全年淨係放農曆新年。

▪ 地盤佬日誌—地盤最重視嘅節日

▪ 地盤佬日誌—好判頭&好騙頭

做工程做到孤獨終老？

好多人都覺得做工程嘅人冇乜女人緣，雖然地盤嘅女性比例都係真係比較少。不過以我個人觀察，地盤佬有另一半嘅比例又唔比其他行業低。所以我覺得追唔追到女仔，其實好睇你自己，而唔係睇你做咩行業。

最盡

雖然都好多人話自己一生奉獻咗俾工程，不過真真正正去到最盡，好多時就係工傷導致永久傷殘或者死亡。喺度都祝願各位師傅可以安安全全，平安退休。

我成日都話我哋工程呢個行業，雖然以全行嘅人工嚟講，係算一個唔錯嘅行業，但係綜合工作環境、工時危險程度等等嘅綜合因素，工程都算係博得最盡嘅其中一行。

港夫．李澳

香港土生土長，近年來移居澳門，一個熱愛畫畫的地盤工程師。開立了facebook page「港澳小不同」，通過圖文來與人分享我心中所想。

檢視此作者的所有文章 

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。