【長輩題 - 工作版】拜年親戚FAQ：「搵幾多錢？又轉工？你仲未搵到工？」

「年，又過年，共慶歡樂綿綿……」面，又見面，共聚親戚問年年……鍾意問你的工作前程和「錢途」！面對一些事關個人私隱與公司機密的問題，唔想講出心底話，又唔想講大話，兼唔想影響新春和諧氣氛，而想應對得體，有請專家分享回答技巧。

問者有心定冇心，聽者須留神。基督教家庭服務中心盈力僱員服務顧問高級經理吳慧琪（Wicky）提點，迎戰大舅父三姑姐等提問，先從關係親疏、表情語氣等，嘗試了解其動機，究竟是出於關心，還是純粹八卦。打工仔回答時便可循兩個方向：一、對方真‧關心的話，可反映自己工作上無遇到任何問題，減少親人牽掛；二、只屬好奇的，甚至語帶諷刺，則表示說者自我感覺良好，你可以表示不認同對方的負面假設。速成這套內功心法，自可輕鬆應付5條拜年涉及工作情況的FAQ。

問題一：你一個月有幾多錢人工呀？

回應關心者：你放心啦，我嘅收入夠自己使，兼夠俾家用添。（心法：毋須透露實際收入，亦不宜在大庭廣眾提及簽訂薪酬保密協議。誠懇對應，令對方減少牽掛，不會再追問。）

答八卦一族：我嗰職位市場價由萬幾到幾萬蚊，過年後會有人工加，但暫時唔知加幅有幾多。（心法：反映個人對目前薪水滿意。）

問題二：你舊年畢咗業，到依家仲未搵到工？

回應關心者：唔使替我擔心，我要求高啫。遲吓再搵唔到，我自然會降低要求㗎喇。況且喺呢段時間，我都有學嘢增值㗎。（心法：令對方，特別是長輩放下心頭大石。）

答八卦一族：我人生第一份工作，要搵到百分百合適，有發展前景嘅先會做，暫時未遇到啫。（心法：若發現親戚語氣有點譏諷，宜心平氣和地回應。）

問題三：咦，你仲係做主任，二表哥嗰仔同你同年入同一行，佢依家已經係高級經理……

回應關心者：間間公司嘅政䇿唔同，喺我公司嘅架構，主任已經好高級。（心法：表明自己滿意現狀，橙亦不應同蘋果比。）

答八卦一族：間間公司嘅政䇿同架構都唔同，我好少同外面啲人比較。（心法：保持禮貌，顯示自己無被其「人比人，比死人」的問題困擾。）

▪拜年必備！親戚FAQ：人工幾多？幾時結婚？5個幽默神回應秒殺萬年長輩題

▪ 2024 龍年12生肖職場運程｜「龍」友氣場低 「馬」仔捱出頭 ？玄學家教路手機Wallpaper增運勢

問題四：點解你仲未轉工，你哋啲後生仔唔係興成日跳槽嘅咩？！

回應關心者：份工做得開心，有前途，好穩定，暫時毋須轉工。（心法：面帶微笑，講明份工好okay，對方自然「收貨」。）

答八卦一族：同期啲同學都唔興跳槽，我又唔係唔穩定嘅人，份工做落有興趣，仲睇到前景，咪唔需要轉住。（心法：對這帶點「以偏概全」的假設性問題，毋須不滿駁嘴，帶出凡事有另一面，回應點到即止便可。）

問題五：吓，你又轉咗工？仲轉埋行？成日咁跳，點解嘅？

回應關心者：趁年紀仲輕，我想試多啲唔同嘅工種；若有機會，我仲會試多幾行。（心法：強調不是「被」轉行，而是自己積極求變而已。）

答八卦一族：我喺無腳嘅雀仔，性格鍾意周圍跳。唔飛過，又點知外面嘅世界天大地大呢。（心法：用幽默感化解「挑機」問題。）

▪ 開工利是有公價？把握最佳時機向上級拜年 保持形象攻守兼備

▪ 轉工期望加薪4成？後生仔Expected Salary大躍進嚇親HR 5大指標睇清「薪」價係咪堅離地

一句到尾，避免「赤口」：

到底是大時大節，長輩問到尷尬的工作問題時，嬲佢唔知，話佢唔好意思，還是keep住和顏悅色吧。若是較年輕的平輩或後輩，可加些幽默感（如無腳雀仔），大家喜氣洋洋，迎接事業豐裕肥美的豬年！

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。