香港IT人:下一份IT工是天堂,還是地獄?

下一份IT工是天堂-還是地獄

(image via Office Snapshots / Phil Whitehouse via Flickr)

其實好多人對IT工有好大誤解。佢哋成日以為做IT好似打機咁好玩,然後就話好想做IT;又見到Google、Facebook嘅office咁靚,仲周圍都係娛樂設施同零食,以為只要入行做IT就爽過升仙。事實又係點?


外國的IT工

講真,好多好成功嘅IT公司都明白員工係佢哋最重要嘅資產,因為做IT靠嘅並唔係金融投資或買賣貨品,而係靠員工們嘅腦袋。所以好似Google、Facebook呢啲公司,最高管理層本身就係做IT,所以必然會好好善待班員工。

好到點?免費零食、無限手調咖啡、無限假期、office入面已經有無數娛樂。而且通常個office都會裝修到好colourful,去刺激員工創意。如果係美國等地,工作地點有室外地方的話,間公司亦會將呢啲室外空間佈置得好舒服,眼見之處全部都係草地,寬闊嘅行人路,仲有好多鮮豔嘅擺設。

喺Policy上,好多時公司都會俾員工反映意見,例如邊度做得唔好,可以點樣做得好啲,而且唔係齋講,係真係會有人跟進。總之,員工嘅舒適感絕對係排首位。就算只係佢哋喺香港嘅辦公室,你都會感覺到佢哋對員工有幾重視。

入到呢啲公司,睇嚟好似上天堂一樣,間直係夢寐以求嘅工作。咁你又知唔知如果唔係Google、Facebook呢類公司,工作環境又會係點?


香港的IT工

零食,冇。咖啡,自己沖。假期,跟勞工法例,即係一年有7日大假,就算perm位,比到15日你已經要謝主隆恩。Office裝修目標係放到多啲枱,所以人人都要坐「豬肉枱」,department head都一樣。想坐房?入meeting room開會嗰陣咪有房坐囉。娛樂設施?諗都唔好諗,你係嚟返工架。

仲有,你唔知你份糧係包咗「受氣」呢個item㗎咩?唔好以為你想點就點。你想反映意見咩?我諗到你遞信嗰日先有人願意聽,不過聽完都係馬照跑,舞照跳。日日OT不特止,返到屋企諗住可以休息?記住check WhatsApp,老細隨時都會搵你;有啲老細癲起上嚟仲會公器私用,叫你上佢屋企整電腦、裝router。

唔係天堂都算,好多IT人都只想留喺人間界,但好多時都跌咗落地獄。而且,轉工係改變唔到命運,好多時都係由一個地獄跳去另一個地獄,不停輪迴。你問我點解做咗咁多年,仲要喺呢個行業打滾?其實好多時都係為咗每次完成一個project嘅滿足感,呢種滿足感亦都係大部份IT人一直堅持喺地獄打滾落去嘅原動力。

 

Sam Yung

 

在香港IT界打滾多年,從一個小小的Programmer開始奮鬥,到成為某大公司的IT管理人員,親歷科網泡沫爆破後,香港IT界慘不忍睹的境況。網誌:香港IT人

 

檢視此作者的所有文章

 

此文章由原作者及jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,原作者及jobsDB保留採取法律行動的權利。

 

延讀閱讀:

IT人搵工攻略(3):外行人能否入行?

IT人搵工攻略(2):Phone Interview

IT人搵工攻略(1):Technical Test

 

想尋找你下一個機遇? 立即瀏覽jobsDB最新Information Technology (IT)職位