初創企業(Startup)啱你做嗎?十個好壞處分析

初創企業(Startup)啱你做嗎?十個好壞處分析

全球創業潮興起,無論喺美國嘅矽谷、德國柏林、印度、新加坡,定係中國北京、香港,初創企業(Startup)都增長驚人。近年來較著名嘅成功例子有Uber同Airbnb,但係根據哈佛商學院嘅報告,75%嘅創投公司係以失敗告終,存活率低。

呢個數據並唔係想指出入職初創企業就冇好嘅前景,而係要先仔細衝量其中好壞。如果你考慮投身初創企業,初企嘅工作文化和環境,又啱你做嗎?


五個投身初企的好處

#1 開放

初創企業通常有一個開放而平面嘅管理架構,呢個特點令到初企更有效率同生產力,團隊嘅工作關係同合作亦會更和諧。初企員工通常對公司有好強嘅歸屬感,對公司嘅忠誠度更高,同僚之間更有愛。

#2 彈性

初創企業嘅做事方式唔固定,因此常常會提供彈性嘅上班時間或遙距工作模式。高彈性確保員工可以充分發揮創意,隨時隨地工作,有助提高員工嘅獨立自主性。

#3 活力

常規企業面對市場變遷時,一般嚟講,反應較為保守;而初創企業對於接受改變同創新,就會抱持住開放而積極嘅態度。初企為咗擴大影響力,會表現進取,期望喺變遷之中成功打開市場缺口,或者顛覆現有業者,分得一杯羹。

#4 自主獨立

初創企業對員工相對有信心,需要作決定時,會給予員工獨立自主性。你並唔止於被動執行上層交待嘅任務,而係有更多機會,嘗試更多層面嘅決策。而呢啲參與管理嘅經驗,會令你得到快速嘅成長。

#5 創意

以上提及到嘅優點,塑造咗初企勇於創新嘅環境。你會被鼓勵去突破現有嘅框框同尋求新機會,一有新想法,可以隨時攞嚟討論同實行。


五個投身初企的壞處

#1 混亂

初企對市場反應靈敏,但呢個特質同時會容易導致公司政策混亂同不穩定。假如政策天天改嚟改去,朝令夕改嘅文化,可能會令到團隊無所適從,顧客對初企嘅可信性亦會降低。面對呢種情況,員工或者會覺得茫然,對公司嘅未來動向充滿疑惑。

#2 財政不穩

剛剛起步嘅初創企業,係較難去獲得早期嘅資本。投資者認為初企冇盈利紀錄,又難以預測持續獲利嘅可能性,大部分唔願意冒險去注資。初企要尋找足夠嘅資金去維持營運,同時要達到現有最大利潤,唔係一件容易嘅事,因此財政可能會不穩定,一唔小心就會陷入財困。

#3 工作至上態度

好多投身初企打工嘅員工,都超越咗打工仔嘅身分,將份工當成自家事業嚟打拼。團隊雖小,但個個鬥志旺盛,熱衷於擴大業務。如果你只係想要一份穩定嘅人工,咁你可能未必適合初企嘅環境。

#4 需要超強學習力

初企對市場反應快,但又因為資源有限,個人或者團隊需要快速地掌握新知識,繼而達成目標。因此,初企會比起一般企業更加要求員工不斷自我提升。如果你係一個按章工作嘅人,初企未必係你最好嘅選擇;但如果喺初企表現出色,晉升階梯亦會快過一般企業。

#5 扁平架構

上面提到初企有扁平嘅管理架構,對員工嘅組織管理能力同決策能力有較高嘅要求,好多時候需要一腳踢去完成目標。如果你缺乏獨立性,冇自信去做獨立決定嘅擔當,偏好準確地執行任務的話,初企嘅工作環境,未必適合你。


初創企業近年屢創神話,而喺未來的日子,呢股創業風潮勢將再下一城。準備投身初企嘅朋友,尤其係經驗淺嘅Fresh grad ,做決定之前,記得多考慮初企嘅文化,與個人事業意願、性格係咪配合。

 

延讀閱讀:

「Career Path」沒有你想像般重要

一次過解答Fresh Grad今年搵工嘅疑難

30歲如何規劃職業生涯的下5年?

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案