【周末兼職達人】係咩驅使佢星期六日都兼職?炒散Event Helper做足十幾年

【周末兼職達人】係咩驅使佢星期六日都兼職?炒散Event Helper做足廿年

提到Event Helper,好多人都會諗起會展啲helper妹妹,其實除咗啲大型展覽,有好多場合都需要請Event Helper,例如話商場活動、演唱會、頒獎典禮、大型比賽等等,算係一個好多元化嘅炒散職位,尤其係星期六日,呢類兼職位更加係需求大增﹗最緊要係呢類職位有機會即日出糧,做完就閃,冇追數負擔,係一個搵外快嘅好出路﹗

八十後炒散十幾年,星期六日兼職賺外快

從事物流界嘅Macy(化名)一直都有做Event Helper,「由十幾歲做到三十幾歲,呢行真係長做長有。」學生時代Event Helper類型較單一,都是啲行行企企工作,「唔止Event Helper,都會做吓promoter,主要係幫啲電訊商做推廣活動咁囉﹗不過promoter就真係需要sell吓嘢嘅,都係 Event Helper做得順心啲。」

喺Macy眼中,Event Helper工作唔算辛苦,但都視乎性質而定:「譬喻有啲運動比賽,睇下場、執頭執尾、運送物資等等,唔係太難,但要頂住勁熱嘅天氣喺戶外工作,就真係需要體能同意志嘞﹗」至於係咪份份都即日出糧?Macy就話:「唔一定﹗有啲會事後再畀cheque,大型嘅活動通常事後出糧。」

▪除咗Event Helper,仲有邊啲兼職炒散空缺?

一星期返足七日,有時都想抖抖

本來做開活動嘅Event Helper,後來有炒散行家refer Macy做婚禮helper,就係咁開展咗佢嘅另一條星期六日嘅兼職路線,「本身份工係要shift咁返星期六半晝嘅﹐第一次做婚禮helper就撞正星期六返長周,咁十二點幾放工我就去食飯兼換件衫,hea一陣就去咗酒店幫手嘞﹗」原來主人家筵開五十幾席,wedding planner要請五個Event Helper去幫手,「個個都有唔同崗位,但要識執生同互補,咁通常係五星級酒店擺得咁多圍又請得起wedding planner搞婚禮嘅,唔會係普通人家,所以衣着同manner都要得體少少,唔使着suit咁誇張,但離不開全黑上陣,莊重企理啲嘛﹗」

做過一次,Macy仲開始愈嚟愈有興趣,「做婚禮係開心事,你睇住人哋係嚟祝賀一對新人,兼且成個場合都好喜氣,所以幾開心,同埋即日現金出糧係幾爽。」有咩辛酸嘢?「放飯時間好短,要去廚房食飯盒囉﹗同埋全日都要企,做到十一點,要幫手執手尾。」至於點樣搵到呢類工作?「我之前都係上網搵,開咗個頭就會有人脈,人哋會搵返你。至於婚禮嘅Event Helper,就係through其他行家去介紹,大家都炒散,會互相call人幫手。」咁好唔好pay?「婚禮就八百到一千一日都有,通常由四至五點standby到夜晚十一點,其他event由五十幾蚊到八十蚊一粒鐘都有,視乎間公司同活動性質。」

至於搵外快數字有冇達標?Macy笑謂:「一時一啦﹗上個月就返咗三日,都有接近二千蚊。撞啱聖誕、新年呢啲黃金檔期就和味,接商場活動做埋紅日假期,可能會有五千至七千幾額外收入。」

延讀閱讀:

乞客:客人寶寶搞笑英文語錄

打工仔Part-time做乜好 小心唔好被捉到

我們有需要尋找「副業」嗎?

 此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案