地盤佬日誌:地盤限定,你問我答——地盤佬搵幾銀?

地盤佬日誌:地盤限定,你問我答——地盤佬搵幾銀?

每個職業都有佢嘅獨特之處,而作為一個工程師,我都成日畀人問一啲有關地盤嘅問題。今次就等我一次過回答幾個常見問題,解答大家嘅疑問。

1.地盤佬搵幾錢人工?

相信每一個有返工嘅人都曾經畀人問過你人工係幾多。多數做文職嘅畀人問都會係旁敲側擊咁問,但係地盤佬(工人)就因為每年工會都會公布一個各行頭嘅建議日薪,所以其實大家可能都心裡有數。

有時認識一個新朋友,佢一介紹自己係一個紮鐵佬,其他人就可能會馬上心算:$2,400×25=$60,000(雖然實際上多數紮鐵佬都冇咁多),之後就會彈一句:「咁你咪好高人工,仲高過我做經理。」事實上,地盤管人嗰個人工可能真係仲低過被人管嗰個,一個開足工嘅紮鐵佬人工可能高過一個高級管工或一個工程師。

可以畀個參考大家:一個啱啱畢業嘅工程師人工大約係$15,000-23,000,做3-5年後又叻仔考到工程師牌就$35,000+,再之後就睇自己造化啦。

係地盤專業管理層裡面,人工最高應該就係建築師。話說當年啱啱畢業,同我一齊入去同一間公司做嘅新人建築師,人工係我兩倍幾。不過聽説澳門畢業嘅建築師,人工反而比工程師低少少。

▪ 為甚麼安全帽有不同顏色?5個工程界的冷知識

▪ 各行各業嘅參考薪酬數字,呢度搵得到﹗

2.做地盤佬開唔開心

作為一個地盤佬,工作上最開心嘅係地盤啲人多數都比較真性情,鍾意你就對你笑,唔鍾意你就鬧。另外,地盤嘅人流動性比較高,如果有心的話,係可以識到好多唔同類型嘅人。

當然,唔開心嘅嘢都唔少。首先一定係辛苦啦,六天工作、朝八晚六、日曬雨淋、擔擔抬抬都咪話唔辛苦。另外,地盤工人返工同出糧都唔穩定,對於要養家嘅人嚟講其實會有啲不安。

3.支天秤仲高過座樓究竟係點起?

至於工程嘅專業範疇方面,我自己畀人問得最多嘅就係:支天秤咁高究竟係點起出嚟?我自己平時就會答:佢係自己升自己上去㗎。個過程係:

  1. 在柱身最上一節安裝升機籠
  2. 需要加高時,先將天秤主體鎖緊在升機籠,並將天秤主體同柱身(標準節)分離
  3. 使用升機籠嘅油壓千斤頂將天秤主體升高約一個標準節嘅高度
  4. 用天秤吊車將加高用嘅標準節吊運到升機籠內,然後鎖定
  5. 做重力測試

 4.啲樓頂唔頂得住打風㗎?

「我屋企住30樓,上次打風幢樓擺得好勁呀,魚缸啲水係咁郁,我仲搖到頭暈,有冇危險㗎?」

工程師同IT人一樣,冇事冇幹就無人搵你。話說上次颱風山竹時,我同我好多工程師朋友都畀勁多人問呢個問題。

其實世界上任何材料喺受力時都會有一定程度嘅變形,只要變型唔超過材料嘅彈性變形限制,基本上就係安全。例如30層100米高嘅樓,根據政府指引「高度/500」嘅標準,在設計風力時樓宇最多向後移0.2m,加上有機會有反向風等理由,所以前後擺動係有機會達到0.4m,不過如果你本身唔怕暈浪其實就冇乜問題。

如果大家對於地盤佬或者工程師嘅職業有咩想知的話,可以send去[email protected]留言問我,我識嘅都會盡量答。

港夫.李澳
香港土生土長,近年來移居澳門,一個熱愛畫畫的地盤工程師。開立了facebook page「港澳小不同」,通過圖文來與人分享我心中所想。

檢視此作者的所有文章

延讀閱讀:

地盤佬日誌:地盤術語

聶瞳:向年齡歧視說不,睇CV不如見真人

鬥秀棋:職場大廝殺之薪酬階級爭奪戰

此文章由原作者及jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,原作者及jobsDB保留採取法律行動的權利。

 

想尋找你下一個機遇? 立即瀏覽jobsDB最新Building & Construction職位