打工仔Part-time做乜好 小心唔好被捉到

聽聞有啲打工仔平時返工,有三分一時間係做緊公司嘢,三分一時間同同事傾無聊嘢,仲有三分一時間係做緊私人嘢,訂飛睇戲Book枱食飯同淘寶統統都重要,小編點會唔明。喺呢個Slash時代,部分打工仔更加充分利用時間秘撈做Part-time,增加額外收入。如果打工仔有時間,又想賺多少少錢去多轉日本,可以做乜好?咁就要睇睇你屬於以下邊類打工仔啦!


醒目食腦型:開網店

打工仔Part-time做乜好 小心唔好被捉到

呢一類型打工仔轉數快,緊貼社會最新動態同潮流,最啱做網店店主,只要份工可以用電話,打理網店就唔成問題啦。近年Facebook、IG、拍賣網、淘寶等網絡平台愈來愈多,人人都可以開Account做店主,同時物流配套包括快遞公司同智能櫃普及化,完善嘅配套造就一個網店黃金年代!

講一個成功例子畀大家知,前排有個醒目OL學完點整月球燈,就試吓將個燈放喺蛋糕上面,點知一炮而紅,每個蛋糕賣幾百蚊,銷情好時都賺唔少呀!無心機整蛋糕嘅打工仔唔使灰,只要你有腦,總會諗到好橋嘅;有好題材又可以試吓拍片做KOL,隨時殺出一條血路。


專業知識型:做導師

打工仔Part-time做乜好 小心唔好被捉到

有一技之長嘅打工仔,就最啱做導師啦!有返咁上下學歷嘅話,可以去做私人補習老師,好處係毋須簽合約,只要同家長協商好時間就得,時間上比較彈性,收入亦唔錯。不過如果上門補習,而學生屋企偏僻,來回時間長就唔抵啦。

另外,如果打工仔身懷特技,更加可以去做各種樂器、球類運動等嘅導師,唔使浪費畢生所學。如果唔想教小朋友,都可以針對近年運動風,專門教人健身、瑜珈、開跑步班。或者你嘅特技係插花、做手工皂、攝影、畫畫、西洋書法,甚至係天文觀星,都可以用坊間嘅中介App或網頁搵學生。不過前提係享受教學,否則呢份秘撈都唔啱你啦!


才華洋溢型:做Freelance

打工仔Part-time做乜好 小心唔好被捉到

有創意嘅打工仔,絕對唔驚無秘撈,坐定定做Freelance就最爽啦!從事媒體工作嘅人包括記者、編輯、攝影師、平面設計師、翻譯等等,都係才華洋溢型打工仔;而文字工作嘅好處係,只要有電腦、有Idea就可以開工,時間地點完全不限,打開個Word就做得,做緊正職定秘撈,Who knows?

要接Job,先要有人脈。小編有個做開飲食版嘅記者朋友,佢又識人做食評平台,於是就搵佢幫啲新餐廳寫食評,寫兩、三篇稿,每個月平均賺到三千蚊!至於平面設計師、攝影師都係一樣,如果同舊公司關係好,做生不如做熟,隨時轉咗工都繼續有Job做。所以幾時都話,識人好過識字呀!


多勞多得型:時間換金錢

打工仔Part-time做乜好 小心唔好被捉到

仲有一種勤力打工仔,返工時間畀老闆「目及」到實一實,或者忙到電話都無時間睇,就係多勞多得,以工餘時間換金錢型。呢一類型打工仔最啱做一次性嘅炒散工作,例如展覽Helper、派傳單、侍應、活動推廣員、售貨員等等,工作一完結就有糧出!不過炒散工作始終無任何福利,而且遇上不良中介仲可能被拖糧,打工仔要打醒十二分精神啊。


講完咁多生財渠道,小編都要提提大家:有啲公司嘅僱傭合約要求兼職要先申報,或禁止違反公司利益嘅兼職,被發現有機會被炒、賠錢、甚至要被人告;有啲秘撈(例如炒黃牛或傳銷)更加可能觸犯法例。打工仔秘撈前要諗真,睇清楚合約內容並小心衡量風險,千祈唔好被捉到痛腳啊。

 

圖片來源:
逃げるは恥だが役に立つ/TBS | SLAM DUNK/テレビ朝日 | 我和殭屍有個約會/ATV | バンビ〜ノ!/日本テレビ

 

延伸閱讀:

[超實用]辦公室電話英語懶人包

調查:僱主收到畢業生CV會睇啲乜?

放假前指定動作──寫自動回覆E-mail

 

此文章由jobsDB HK撰寫/編輯。如欲刊登於其他網站或刊物,請電郵至[email protected]與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案