請病假唔係打個WhatsApp咁簡單

天氣轉涼,返到公司見到隔離左右吉咗一兩個位,就知又有人領嘢。同事T有次不幸中招,頭暈身慶之際,就咁send個WhatsApp俾老細話請假就倒頭大睡,結果第二日返工即刻被捉入房剷上天花板,話佢唔尊重、冇禮貌云云。從此全公司冇人敢再用WhatsApp請假。

病咗休息固然重要,但作為一個盡責嘅打工仔,想請病假請得好好睇睇,就要做足以下三步曲:


第一步:到底有冇一個好理由先?

可能你心諗:「合約寫明有12日病假,冇奶油唔俾我放啫!」但殘酷嘅現實中,係唔會有老細鍾意下屬請假。唔想俾機會人話你呃假放,就要先確定自己有個合理嘅請假原因。

英國醫療保險公司AXA PPP Healthcare早前就訪問咗1,000名公司高層對員工請病假嘅觀感,原來好多老細都覺得傷風同偏頭痛唔係合理嘅病假理由!

管理層認同的病假理由


第二步:了解公司嘅請假潛規則

近年不少管理層抱怨80、90後就咁打個WhatsApp請假就算,其實唔同公司對請假方法嘅要求都唔同。有啲新派嘅上司接受用WhatsApp或SMS,但基本上大部分公司都要求email或電話通知;有啲除咗通知上司,仲要通知埋人事部同部門同事;有啲要求開工前一個鐘通知,有啲要求開工後半個鐘內通知。如果你新入職唔清楚公司嘅風格,最好先問吓同事。


第三步:請假唔等於人間蒸發

為免成條team因為少咗你一個就陷入混亂,如果身體情況許可,可以花幾分鐘寫個簡單email同上司交代返手頭上處理緊嘅事,有咩deadline要搵同事幫手頂住先,有咩唔急可以遲多幾日先做。如果你有預感第二日會病發需要休息,亦可以俾少少hints同事,等佢哋有心理準備。


萬事俱備,最後唔好唔記得──睇醫生,食藥瞓覺,第二日交返張病假紙俾HR。

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案