「點解我咁唔鍾意啲90後員工」

點解我咁唔鍾意啲90後員工

「你有冇帶腦返工㗎!個excel跟住個客份form入都可以入錯,明明係女人變咗男人,manager變咗manger,仲有個人名點解會全部細楷㗎!」

「咁佢係咁寫嘛,我咪照住佢咁入囉。」

「你識唔識用個腦諗吓㗎!讀咗幾年大學,一啲常識都冇?少少彎都唔識轉?公司同請舊木返嚟有咩分別呀!」阿Carl O咀望住你唔出聲。

—–

女老闆好鍾意請90後,話佢哋又平又好用喎,所以不時會請啲畢業生或者summer intern嚟做,而你每年都要湊一兩隻呢啲咁嘅奇行種。

啲90後最大嘅問題係冇厘醒目,又自把自為。好似呢個阿Carl咁,做啲手板眼見工夫嘅文書工作,都可以做錯、做漏,但佢唔識又唔會問,話完佢又一啲悔意都冇,好似仲怪返你冇一早話俾佢知咁。

最嘔血嘅係,佢哋好似機械人咁,踢一踢先郁一郁,一啲都唔主動,又遲到早走,每日只係望住個鐘等收工,返工竟然可以塞住對耳仔聽歌、上網買衫,甚至趴喺張枱度瞓覺。你問佢做乜瞓覺,佢話:「我做哂啲嘢啦嘛。」「做完你又唔出聲?我十九幾樣嘢俾你做呀!」然後佢又O咀望住你唔出聲。

仲有,佢哋長年喺溫室長大,諗嘢好天馬行空、不設實際,聲大大冇貨賣。幾年前有個Kelvin,成日喺度話公司嘅管理制度僵化,充斥住冇料扮四條嘅老屎忽,啲marketing橋又老土冇人會買,完全冇前景。佢自己就懶係有vision,話想去working holiday見識世界,跟住返香港自己開公司喎。你苦口婆心咁話,細路你入世未深,working holiday係輸入廉價外勞,俾班傻仔去做洗廁所、摘生果呢啲本地人都唔做嘅低層工作,俾人搵笨都唔知,仲話要做生意,攞老豆老母啲棺材本嚟校飛。佢唔聽,兩個月之後佢就遞信走咗。

—–

其實,你自己都好明白喺香港打工係唔會有出路。曾幾何時,你同班大學同學揸住枝啤酒講,第時儲到筆本金之後就夾份做網上買賣生意,宜家科網發展得咁快,一定有得撈。講咗十幾年,大家除咗個肚腩大咗之外,好似都冇乜進展。大家事業都開始穩定,如果要辭工搞一壇新嘢,個opportunity cost會好大,包含咗你嘅家庭、你嘅父母,同埋你十幾年唔會再返嚟嘅青春。

上年年頭,同你拍咗13年拖嘅女友,喊住話再唔買樓結婚就同你分手,你知道唔可以再拖,把心一橫耗盡60萬積蓄俾首期,按九成,供30年,入咗九龍灣一個400呎嘅單位,女友表示滿意。兩個月前,你睇到自己嗰區呎價跌穿咗9,000元,仲話會再跌三成,你決定唔再睇新聞,潛心事業,腳踏實地一步步向上爬,總會養得起頭家。宜家你同女友儲緊30萬結婚,佢話明一有咗就會辭職喺屋企養胎……媽呀,越諗越驚,都係專心做嘢罷啦。

—–

「阿全,入嚟講兩句吖。」女老闆背後一句,嚇到你返回現實,因為佢把聲鑊味好濃。

一入房,女老闆就拍枱,震到佢杯玫瑰花茶瀉咗少少出嚟。「你份proposal唔好再hea啲?次次都交啲行貨上嚟,我請你返嚟copy and paste呀?你用個腦諗吓點做得唔得呀!」

「係,我知道……」

跟住,佢連續鬧咗你半個鐘,而你只能夠回應「係嘅」「明白」「我會㗎啦」呢啲短句。最後佢講咗句:「Ruby真係話得你哋冇錯!」

你個心震咗一震。Ruby係上年嘅intern,佢好smart、好做得嘢,但個性太aggressive,唔識人情世故,見到唔順眼嘅嘢會兜口兜面插,你哋個個都好憎佢,偏偏女老闆對佢嘅作風好受落。佢last day嗰日,竟然入房同女老闆講哂全公司每個部門有咩問題,啲manager有幾唔掂,然後拍拍屁股走人。但係你哋一眾中層,就俾女老闆照到肺都爆,到咗今日都仲講緊。

「成碌木咁企喺度做咩呀!仲唔返出去做嘢!」

「係,知道……」

—–

返埋個位咁啱已經六點,你見到阿Carl執緊嘢準備走。「你做咩呀?啲嘢未做哂㗎!」

「我女友今日生日,要陪佢食飯呀。」

你即時火都嚟埋。「女友生日大哂呀!你有冇責任感㗎?份嘢咁urgent,你唔係就咁走咗去吓話?食遲一日駛死呀?星期六日放兩日假去食到你嘔都得呀!」

「我要走啦……」阿Carl好似聽唔到你講嘢咁,拎住個袋閃閃縮縮咁竄咗出大門。

走啦走啦!你哋班90後,最好玩埋呢幾年,到正式上戰場嗰陣,睇吓仲有冇人肯包容你哋吖。你行錯咗一步,只會一沉百踩咋!

—–

到你終於send咗份改好嘅proposal出去,已經係四個鐘之後嘅事。夜幕低垂,你決定今晚要返去好好瞓返覺,點知一行出馬路,就差啲俾架急轉彎嘅銀藍色波子撞親。

「有冇搞錯,點揸車㗎你!」你大鬧。

「唔好意思,咁啱……咦,你咪係全哥!好耐冇見啦喎!」你定一定神,發現駕駛席上面嗰個……竟然係幾年前個Kelvin?以前佢成個傻仔咁,點解宜家會著住套Armani㗎?仲有佢架車,雖然睇得出係舊款,但真係一架波子嚟!最重要嘅係,佢隔離坐住個著吊帶裙嘅女仔,雖然濃妝咗少少,但對眼好大,身材好好,睇落只係20出頭。

「哇,Kelvin,冇見咁耐,你好似幾幾……幾好景咁喎。」

Kelvin歎氣咗一聲:「唉,唔好提啦,我喺歐洲working holiday返嚟之後,開咗間IT公司,日日做十幾個鐘,冇得休息,辛苦到死呀!今年叫上咗軌道,先至好啲咋。唔講住啦,今晚Happy Friday,我要車女友上山頂飲嘢呀。遲啲約食飯吖!」

講完之後,佢就踩油揚長而去。跑車獨有嘅加速引擎聲,將你同你嘅自尊心淹沒咗。

—–

心情好差,你決定去便利店買返包煙吹吓先。個店員好後生,好似阿Carl咁呆頭呆腦。

「俾包黑冰吖唔該。」個店員慢條斯理咁轉身,然後拎咗包煙俾你,你一見到個盒,又再次火冒三丈。

「有冇搞錯!我要黑冰,唔係黑萬呀!顏色都睇錯,你有冇病呀!你哋班90後,全部都係高分低能嚟㗎!」

「吓,先生,我係00後嚟㗎喎……」佢O咀咁望住你。

「我理得你乜嘢後吖!」

忽然間,你嘅憤怒同感慨好似隊咗六罐啤酒,一下子要嘔哂出嚟咁。年輕人的確好傲慢,目中無人,不設實際,但你已經返唔到去以前,做返90後嘅自己,做錯事會被原諒,一切可以重新嚟過,擁有無限嘅機會同可能性。你要肩負嘅重擔,為任性而付出嘅代價,比佢哋大十倍。

買咗包煙,搭上返屋企嘅小巴,你拎出手機,上去某大forum,開始打字:「點解我咁唔鍾意啲90後員工……」

 

延伸閱讀:

有一種複雜關係…叫做辦公室關係?

要錢定要命?香港八個傷身職業

出現這10大徵兆,可能代表你是時候轉工了

 

此文章由jobsDB HK撰寫/編輯。如欲刊登於其他網站或刊物,請電郵至Editor@jobsDB.com與我們聯絡。如有發現侵犯版權,jobsDB保留採取法律行動的權利。

 

無時間搵工但又想工搵你? 立即建立你的jobsDB檔案

無時間搵工但又想工搵你? 立即更新你的jobsDB檔案