地盤佬日誌-冇工返做咩好？

做工程好多時都係三更窮五更富，好景多嘢做嗰陣時做一年可以返三百幾日工（連埋OT可能係四五百工）。唔好嗰陣時可能幾個月都要坐喺屋企。咁未有工開，有咩可以做呢？

裝備自己

喺冇嘢做嘅時候就要睇吓自己有冇咩要進修，例如冇大工牌、密閉空間、或者工程師嘅執照等等，就睇吓搵方法考咗佢。

甚至係其他行業嘅牌照，當年沙士我都識個老總冇嘢做佢走咗去考保安牌，做咗幾個月保安。

好景嗰陣時，大家都等人用可能只要你識做，甚至好揸流攤都會有人請。但係唔好景嗰陣時，就係人搵工，啲公司有得揀就梗係會揀到最好嘅。所以多一樣技能就多一樣。

做下運動

不論係前線嘅師傅定係坐後面嘅白帽，冇嘢做都應該抽啲時間做吓運動，前線師傅可以保持返個身手，後面嘅白帽眼做返啲運動都可以釋放啲多巴胺，個人都會正面啲。保持身心健康最緊要。

去旅行

如果財政上比較豐裕，冇工返可以去吓旅行先，做工程有時一忙就幾年都好難抽到一個長假期出嚟去旅行。或者一路去旅行就一路喺度覆訊息，根本都休息唔到。同埋好多時一放完假返去本身要做嘅嘢，除咗好緊急嘅，你放假都係冇其他人會幫你做。返到嚟啲嘢就堆積到山咁高。或者其他人幫你處理嘅話大家手勢唔同要跟返都係有啲麻煩。所以有能力嘅話就係呢啲時間去考慮下去個長旅行。

朋友要約嘅

冇工返多咗時間，就更加需要約多啲舊朋友出嚟敘舊。好啲嘅情況可以介紹到工作俾你。或者邊啲公司等緊人用。同埋可以睇吓同行啲市價有冇啲咩變化？

就算係冇乜實質利益，同朋友敘舊都可以心情愉快嘅。

定期每日睇吓搵工網

就算市道再差，其實每日都有公司請緊人，可能未必請你個職位，可能啲向上向下一級嘅都可以試一試寄CV。再唔係可能轉行或者半轉行轉下人生跑道都可能係一個機會。冇一份好工嗰陣時，騎牛搵馬都要試吓。

雖然好多人都係手停口停，一失業或者冇嘢做嗰陣時個心就會好慌。不過盡可能都要心態要穩，積極咁去搵嘢做。只要好好準備，機會話嚟就嚟。