地盤佬日誌 - 阿頭永遠是對的？
一個人做到阿頭點都有佢自己嘅能力，能力可以係工作能力、領導才能，勤力型，或者加埋靠年資捱上去，不過都可以係鈔能力同投胎能力。如果對住啲好阿頭當然係最好啦，不過人生流流長梗係會遇到幾個廢人阿頭。點對佢就係一種藝術。
叻阿頭
如果對到叻阿頭係你嘅幸運，通常如果佢哋方向清晰，唔會有咁多浪費時間，你做嘢會舒服好多，有時好阿頭比好公司更加重要。可以的話係佢手下工作期間盡全力去向佢學習，好多嘢都可能係終身受用。
【職場的說話藝術】打工仔要識聽上司10大潛台詞 學定積極及低調版應對方法
如果呢啲阿頭可以坐火箭咁升上去，就可以一路跟住佢，如果你自己都叻仔都可以坐火箭咁升上去。但係如果你個大佬升唔郁，咁就要係時候考慮吓係咪要離開佢出去外面闖蕩江湖。
牛阿頭 或 廢老阿頭
有啲人自己做低層嗰陣時其實係好好嘅員工，做嘢好勤力或者其實做得好好。不過呢啲人做咗上去做中層或者高層嘅時候做管理未必做得好。
對住呢啲阿頭，通常你首先要跟咗佢個方法去做，慢慢得到佢嘅信任，之後先慢慢將佢個老舊方法改返新啲嘅方法去取代佢本身個方法。
好多時佢哋做嘢個方法並唔係唔可行，不過可能效率唔係真係咁好，如果一開始就同佢哋咁多衝突嘅話，咁佢可能就會針對你，之後你都繼續會冇運行。
打工仔質疑上司能力 網民：識做使乜請你？職場新人需認真的10大現實
上司咩都管？打工仔遇控制強上司遭訓斥Lunch時間小睡 必學4招應對Micromanager
鈔能力同投胎王阿頭
對住呢啲靠關係升上去嘅人，就首先要睇吓佢係咩人，如果佢係豪爽型嘅話通常都好啲，最多都係幫唔到你，但係又俾晒啲嘢你做，有咩都要自己揣摩自己去學，但係佢哋可能會俾返啲私人福利俾你。
最怕就係見到啲又㒼塞又自大又廢即係大佬，永遠只係俾條錯嘅方向你，但係又要你跟住做，之後又死唔認錯，覺得錯嘅係世界唔係佢。對住呢啲嘅我都覺得冇乜辦法，只有一句忠告就係早走早着遲走瞓唔着。轉到工就轉工轉唔到工就轉組。
三人行必有我師，人生中會經歷對住好多唔同嘅人，喺每個人身上都學到佢最好嘅嘢，避開佢哋失敗嘅地方，咁先至係最好嘅方法令自己變強。
