六小時工作又得唔得先？

較早前本欄提及四天工作週，大家好像只能望門輕嘆。香港打工仔工時長繼續全球街知巷聞，根據瑞士聯合銀行集團於今年9月18日公布的《2015年價格與收入》報告*，香港勞工工時全球最高，每年高達2606小時，較最低的巴黎多出1000小時，平均每天多出四小時左右；亦遠遠拋離其他亞洲大城市如東京 (2055小時)、台北 (2141小時) 及首爾 (1934小時)。

縮減工時，提升工作效率

大部分老闆都以為工時同工作效率係成正比，但亦有思想前衛的老闆大力反對！自去年起，瑞典應用
程式發展商Filimundus改行每天六小時工作制*，行政總裁Linus Feldt認為縮減每日工時可提升員工集中力和耐力，以及俾員工多啲空餘時間陪伴親朋和享受生活。

瑞典有一所療養院Svartedalens推行咗半年六小時工作制*後，該療養院嘅護士感覺壓力少咗好多，精力更充沛，而療養院實施縮減工時，亦證實工作效率有所提升，員工離職率亦下降了。另外，英國豐田哥德堡服務中心早於十多年前已實施縮短每日工時制*，該公司總經Martin Banck表示，自從縮短工時以來，利潤已經增長了25%。

六小時工作確實係員工嘅超筍福利，對老闆而言，長遠嚟講有乜嘢著數？

員工抖夠瞓夠，身體健康咗，返工精神咗，請病假嘅機會少咗。

• 見多咗親朋密友，心理平衡咗，就算躁底王工作時都冇咁易發作，公司氣氛和諧咗。
• 壓力少啲，生理、心理健康指數持續上升，工作效率亦有望大大提升。
• 員工覺得老闆真心關注佢哋嘅作息平衡，對公司給予萬二分忠誠，唔止冇咁易劈炮，仲會更瞓身拼搏。
• 公司樹立真‧關愛形象，吸納有才華嘅人士加盟，鞏固公司實力。

但願香港老闆能有此見地，造福人群！

 資料來源：

1. 瑞士聯合銀行集團：《2015年價格與收入》(Prices & Earnings 2015) 報告（2015年9月）
2. 蘋果日報：日返6粒鐘最高效，老闆員工都受惠（2015年10月5日）
3. 英國衛報The Guardian: Efficiency up, turnover down: Sweden experiments with six-hour working day（2015年9月17日）

此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。