地盤佬日誌 ─ 環境越差越要比力
之前好景嗰陣時，真係可以求其阿豬阿狗有齊手手腳腳，就可以大把人爭住請。但係唔好景嗰陣時，同一個職位可能就有幾十爭崩頭。
好景是要比力，唔好景更加要比力
好景時比力係要提升自己能力，呢啲時候只要你有能力，上面大把位可以上，升職加薪轉工，全部冇乜難度。但係唔好景時，淨係要保住自己個位，都已經比平時更加努力。不過就算好似努力嚟都冇乜回報都好。 你努力咗得到嘅能力同埋人脈喺你往後嘅日子裏面都會有用。等到環境變好機會就會來。
搵工攻略 | 7大筍工搜尋策略 善用Jobsdb提升求職效率
每個大浪都會淘汰啲人
好景嗰陣時右手右腳就有人請，好多時有啲唔多合格（甚至乎係垃圾級嘅）嘅人都生存到，令到佢哋覺得得過且過都可以，反正東家唔打打西家，四周圍都請人。
但係報咗真係唔好景嗰陣時，市場上面嘅工作機會，可能只夠足夠行業裏面七八成人嘅工作嗰陣時，最差嗰批就好快會因為開工不足被淘汰。只要唔係越嚟越差，淘汰完佢哋之後其他人就可能夠嘢做。
如果盡咗力都搞唔掂，點算？
如果盡咗力都搞唔掂，冇人請的話。就首先要諗吓呢個行業係咪真係適合自己，自己係咪剩係得呢樣技能？ 如果有其他技能嘅就可以試吓先轉轉跑道。 可能佢搵到自己更加鍾意嘅嘢做。如果錢方面搞唔掂嘅就點都要馬死落地行。可能過完呢個浪底之後，又會迎接下一個升浪。又可以轉返入嚟。我地盤之前有個老總，沙士嗰幾年都走咗去做保安，之後好景返先轉返入嚟地盤做。
冇人人生，可以一路都順風順水，點都有高潮同低潮，不過亦都唔會一路都係低潮，低潮嗰陣時就咬緊牙關，更會捱得過嘅。
此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。
