驚佢煩兼唔夾？4招迎新上司令你轉危為機 避免對方唔鍾意你

俗語話：新官上任三把火﹗打工仔至怕突然空降一位新上司，喺完全摸唔清佢咩底勢嘅情況下，真係「未上任，先驚驚」﹗其實有危必有機，作為下屬，如何把握這個黃金機會同新上司進行良好互動，轉危為機？

成日有僱主上社交網頁對應徵者「起底」，其實下屬都可以，通過社交網站如Facebook, Twitter，對他/她的工作背景及個性有初步了解。其實佢post得上網嘅，冇嘢係秘密，所以你唔需要覺得自己似偷窺狂。當然，用假名登入可免得俾上司知道，就唔驚尷尬啦。

當新上司上任後，鎖定第一印象，嘗試踏出第一步：

充當免費嚮導

若然佢係經常笑騎騎，睇落好似幾隨和，咁你可嘗試充當佢嘅嚮導，畢竟佢嚟到陌生環境，未摸熟公司的同事及銜頭，又唔知辦公室的佈局，呢個時候做下屬嘅最好做佢支盲公竹，帶佢四圍行吓，介紹吓其他部門嘅新同事（如果冇專人做），相信咁做或多或少都會俾佢幾好嘅第一印象，之後溝通就容易得多。

俾佢知你或你條Team做緊乜

上司一到埗，似乎不苟言笑，或即刻開會又經常開OT，當呢類務實派係你直屬上司，你不妨多啲主動同佢匯報你手頭上project嘅進度，若然你係中層主管，對落仲有下屬，不妨每星期約定時間，同佢仔細講解成條Team嘅工作進度。咁樣做，會令新上司覺得你樂意同佢好好合作，又好尊重佢，印象分自然又加多啲﹗

食晏同放工後係黃金時機

有啲上司一返工，就經常喺辦公室四圍行，主動同各部門同事打吓招呼，遇著呢類social animal，你不妨趁同佢食晏或放工後，寒暄幾句，問吓佢有咩嗜好、近期睇開咩電影等，大家打開話匣子後，感覺親切啲，傾公事嘅時候氣氛都會融洽啲。

單刀直入了解工作Style

如果新上司面口一時三刻都在變，又好獨家村成日喺自己房，你不妨約個時間同佢傾吓工作模式，例如問佢希望點樣同隔幾耐匯報進度？想面對面？定係透過電郵？有新提議可以一齊討論嗎？你可能會認為，呢啲問題駛乜問？慢慢做落就有默契，但對於你完全唔了解又摸唔透嘅上司，問多啲、了解多啲，免日後誤會重重，對你同成條Team嘅同事都有保障。

無論新上任定舊人，上司其實都係人一個，佢哋初嚟埗到，就算表現出殺氣騰騰，內心仍然會有處於陌生環境的不安全感。所以作為下屬，不妨參考以上方法，與上司進行和諧互動，早日建立良好關係，有利日後工作﹗

 此文章由原作者及Jobsdb HK撰寫／編輯。如欲刊登於其他網站或刊物，請電郵至[email protected]與我們聯絡。如有發現侵犯版權，原作者及Jobsdb保留採取法律行動的權利。